Pullarımızı nağd saxlayaq, yoxsa kartda?

Son günlər bank kartlarından pul oğurluqları gündəmi zəbt edib. Kiberüsullarla gerçəkləşdirilən, cinayətkarlıq növləri sırasında pushing (bank kartlarından pulların oğurlanması) adlanan qanunsuz müdaxilə geniş vüsət almaqdadır. Bu hadisələr vətəndaşları da çaşdırıb: pullarını nağd, yoxsa kartda saxlasınlar?

Median.Az xəbər verir ki, İnformasiya texnologiyaları üzrə mütəxəssis Elvin Abbasov bununla bağlı fikirlərini Modern.az-la bölüşüb.

O qeyd edib ki, müasir dövrdə pulun kartda və ya nağd formada saxlanılması şəxsi ehtiyaclar, texnoloji vərdişlər və təhlükəsizlik baxımından fərqli üstünlüklər və risklər daşıyır. Rəqəmsal dövrlə ayaqlaşmaq baxımından vəsaitlərin kartda saxlanılması rahatlıq və izləniləbilənlik baxımından üstünlük təşkil edir. Onlayn alış-veriş, sürətli ödənişlər, cashback və bank xidmətlərinə çıxış kart istifadəsini daha da stimullaşdırır.

Onun sözlərinə görə, kartdan istifadə zamanı fişinq, skimming, hesab məlumatlarının oğurlanması və ya mobil tətbiqlərin zəif qorunması kimi kibertəhlükələr mövcuddur. Bu risklərə qarşı istifadəçilər 3D Secure-ni aktiv etməli, şübhəli linklərə daxil olmamalı və bank tətbiqlərini rəsmi mənbələrdən yeniləməlidir.

Eyni zamanda banklar da mütəmadi monitorinq və sığorta mexanizmləri ilə bu sahədə qoruma tədbirlərini gücləndirməlidir.

Ekspert açıqlayıb ki, nağd pul fiziki oğurluq, itki və ya təbii fəlakət riski daşıyır. Üstəlik, böyük məbləğləri daşımaq və ya saxlamaq praktiki baxımdan təhlükəlidir və izlənə bilmədiyi üçün hüquqi mübahisələrdə sübut problemi yarada bilər. Bu baxımdan, vətəndaşlar həm təhlükəsizlik, həm də rahatlıq balansını qorumaq üçün vəsaitlərini fərqli formatlarda saxlamaqla riskləri bölüşdürməlidirlər.

Əsas məsələ – maariflənmək və şəxsi maliyyə təhlükəsizliyi vərdişlərinə sahib olmaqdır.