Bakıya yeni avtobuslar gətiriləcək: Nəqliyyat problemi həll olunacaq?

Azərbaycan Yerüstü Nəqliyyat Agentliyindən (AYNA) bildirilən məlumata görə, 2025-ci ildə Bakıya özəl daşıyıcılar tərəfindən 100-dən artıq avtobusun gətirilməsi gözlənilir. Məlumatda qeyd edilib ki, 11 avtobus marşrutu üzrə 154 avtobus yenilənib. 200 avtobus təmir edilərək daşımaya qaytarılmış, həmçinin 165 ədəd elektrik avtobusu daşımalara cəlb edilmişdir. Özəl daşıyıcılar tərəfindən 60 ədəd yeni avtobus gətirilib və bir hissəsi artıq istismara buraxılıb.

Bakıya bu qədər yeni avtobusların gətirilməsinə baxmayaraq, hələ də 20 yanvar metrostansiyasından sonrakı xətt üzrə hərəkət edən avtobuslar yenilənmir. Bu da sərnişinlərin haqlı narazılığına səbəb olur. 

Nəqliyyat məsələləri üzrə ekspert Yasin Mustafayev Qaynarinfo-ya açıqlamasında bildirib ki, nəqliyyat sektorunda aparılan islahatların hamısı əhalinin ictimai nəqliyyatan istifadəyə cəlb olunmasına xidmət edir:

"Hazırkı tıxacı, sıxlığı aradan qaldırmağın yeganə yolu ictimai nəqliyyatın işinin optimallaşdırmaqdan keçir. Artıq bu istiqamətdə ciddi addımlar atılır, zolaqlar çəkilir. Dayanacaqlar təkmilləşdirilir. Eyni zamanda, paytaxta yeni avtobuslar gətirilir. İndi hazırda şəhərə gətiriləcək avtobusların sayının 2500-ə çatdırılması hədəflənir. Yeni gələn avtobusları şəhərin mərkəzi hissələrinə yönəldirlər. Bunu bəzi ekspertlər fərqli şəkildə şərh edir. Amma bir reallıq var, məsələn evimizdə ən yaxşı əşyalarımızı qonaq otağına düzürük. Çünki bu, qonaq üçündür. Nəqliyyat da belədir. Bakıya üz tutan qonaqlar mərkəzə gəlir. Bakının ən yaxşı hissələrində dolaşırlar. Ona görə yeni avtobusların şəhərin mərkəzinə verilməsi normaldır. Bölgələrə, ətraf qəsəbələrə isə mərkəzi hissədən çıxarılan avtobuslar yönəldilir".