Aprel döyüşlərində rüsvayçı məğlubiyyətə görə qovulan general Ermənistanın müdafiə naziri oldu

Ermənistan Prezidenti Armen Sarkisyan Baş nazir Nikol Paşinyanın təklifi ilə bir sıra vəzifələrə yeni təyinatlarla bağlı fərman imzalayıb.

Bu barədə Ermənistan mətbuatı yazıb.

Fərmana əsasən Suren Papikyan baş nazirin müavini, Arşak Karapetyan müdafiə naziri, Romanos Petrosyan isə ətraf mühit naziri təyin olunub.

Yeni təyinatlar arasında ən diqqət çəkəni Arşak Karapetyan olub. O, 2016-cı ilin aprel döyüşlərində rüsvayçı məğlubiyyətdən sonra Ermənistan Silahlı Qüvvələrin Baş Qərargahının Kəşfiyyat İdarəsinin rəisi vəzifəsindən azad edilib.

Daha sonra 2018-ci ildə Nikol Paşinyan Arşak Karapetyana yeni vəzifə verib və onu öz müşaviri təyin edib. Ermənistan mətbuatı generalın bu vəzifəyə 2008-ci ilin 1 mart hadisələri ilə bağlı ifadə verməyə razılaşdığı üçün gətirildiyini yazıb. Arşak Karapetyan 2021-ci ilin 6 aprelində bu vəzifədən azad edilib.

Lakin generalın vəzifədən kənar qalması çox çəkməyib. O, 2021-ci ilin 13 aprelində Silahlı Qüvvələrin Baş Qərargah rəisinin birinci müavini təyin olunub.

Arşak Karapetyan 2021-ci ilin 20 iyulunda isə Ermənistan müdafiə nazirinin birinci müavini vəzifəsinə gətirilib.