Senat və Almaniya Bundestaqından Azərbaycan gənclərinə cavab - FOTO

Gənclərimiz müxtəlif dünya ölkələrinin parlament, konqress, senat üzvlərinə, dövlət rəsmilərinə məlumat xarakterli müraciət ünvanlayıblar.

Bununla bağlı Gənclər və İdman Nazirliyinin mətbuat xidməti məlumat yayıb.

Bu müraciətlərdə Ermənistanın ölkəmizə yönəlmiş işğal, aqressiya, terror siyasəti pislənməklə yanaşı, eyni zamanda, bu siyasət nəticəsində hərbi əməliyyatların getmədiyi Gəncə, Tərtər, Ağdam, Füzuli, Mingəçevir və digər şəhər və rayonlarda yaşayan sivil əhaliyə qarşı törədilən terror aktlarına xüsusi diqqət çəkilib, həyatını itirən, yaralanan, zərər çəkən vətəndaşlar barədə ətraflı məlumat verilib. İşğalçı dövlətin beynəlxalq hüququn prinsip və normalarını pozması pislənilib. Ən sonda gənclərimiz bu ölkələrin dövlət rəsmilərini BMT Təhlükəsizlik Şurasının qətnamələrini yerinə yetirməyən Ermənistanın törətdiyi cinayətlərə hüquqi qiymət verməyə çağırıblar.

ABŞ-ın Kalifornia Ştatının Senatoru Dianne Feinstein, Corciya senatoru Kelly Leoffler, Almaniya Bundestaqından Mahmut Özdemir gənclərə yazdıqları cavab məktublarında bölgədə artan gərginlik və şiddətdən yaranan narahatlıqlarını və Azərbaycanda Ernənistan tərəfindən törədilən terror aktlarından təsirləndiklərini bildiriblər. Azərbaycanın yanında olduqlarını ifadə edən Senat və Bundestaq üzvləri Ermənistan tərəfindən dinc əhaliyə qarşı hücumların da qəbulolunmaz olduğunu ifadə edərək, Azərbaycanın ərazi bütövlüyü uğrunda apardığı bu haqlı mübarizədə ölkəmizi dəstəklədiklərini bir daha ifadə ediblər.