Polis məşhur kimsəsiz uşağı tapdı: anası onu tərk edibmiş

Polislərin tapdığı uşağın Sabunçu rayonunun 14 yaşlı sakini Fərid Vlasov olduğu müəyyənləşib. Bu barədə Oxu.Az-a Sabunçu Rayon Polis İdarəsindən məlumat verilib.

Polis ananın uşağı tərk etdiyini sentyabrın 20-də - Sabunçu qəsəbəsində tapılan küçə uşağının videosu videosu sosial şəbəkədə yayıldıqdan sonra öyrənib.

Araşdırma zamanı məlum olub ki, anası Liliya Vlasova kənddə yaşayan yeniyetməni tərk edib. Bununla əlaqədar sentyabrın 21-də rayon prokurorluğunda Cinayət Məcəlləsinin 143-cü (təhlükəli vəziyyətdə qoyma) maddəsi ilə cinayət işi açılıb. Hazırda cinayət-axtarış şöbəsinin əməkdaşları qadını axtarsalar da, nəticə əldə edə bilməyiblər.

Öz növbəsində, Azərbaycan Uşaqlar Birliyinin rəhbəri, hüquq müdafiəçisi Kəmalə Ağazadənin də qeyd etdiyi kimi, polislər uşağı “Nur” uşaq evinə veriblər:

“Yeniyetmə haqqında süjet “Kanal-13” internet televiziyası vasitəsilə yayılıb.

Fərid Vlasov butulka yığıb, təhvil verir və buradan qazandığı pulla yaşayırdı. Jurnalistə verdiyi müsahibədə oğlan valideynlərinin öldüyü barədə yalan danışıb, deyib ki, qardaşını və bacısını özü saxlayır.

Jurnalistin səhvi onda olub ki, səthi videosüjet hazırlayıb və yeniyetmənin yalan söylədiyini aydınlaşdırmayıb. Bəlkə, onu işləməyə məcbur edblər, bəlkə o, istismar olunurmuş? Heç kim uşağın harada yaşadığını bilmir”.

Hüquq müdafiəçisinin sözlərinə görə, yeniyetmənin hansı şəraitdə yaşadığını öyrənmək üçün onunla psixoloq işləməlidir: “Təəssüf ki, Azərbaycanda F.Vlasov kimi tərk edilmiş kimsəsiz uşaqlar çoxdur”, - deyə hüquq müdafiəçisi qeyd edib.