“İşğaldan azad olunmuş ərazilərin yenidən qurulması və bərpası” tədbiri xərclərinə 2024-cü ildə 3825,0 milyon manat vəsaitin ayrılması nəzərdə tutulub ki, bu da 2023-cü ilin təsdiq edilmiş göstəricisindən 975,0 milyon manat və ya 20,3% azdır.
APA xəbər verir ki, bu, Hesablama Palatasının “2024-cü ilin dövlət büdcəsi haqqında” qanun layihəsinə rəyində əksini tapıb.
Həmin vəsaitin 3 316,3 milyon manatı infrastruktur təyinatlı layihələrin tikintisinə, yenidən qurulmasına (avtomobil yollarının yenidən qurulmasına 2 725,1 milyon manat, yeni yaşayış komplekslərinin layihələndirilməsi və tikintisi işlərinin aparılmasına 258,2 milyon manat, meliorasiya tədbirlərinin icrasına 131,2 milyon manat, dəmir yollarının yenidən qurulmasına 98,9 milyon manat, kommunal infrastrukturun bərpasına 63,5 milyon manat, kadastr xidmətlərinin həyata keçirilməsinə 3,7 milyon manat , bərk məişət tullantıları infrastrukturunun yaradılmasına 1,4 milyon manat və digər infrastruktur layihələrinin icrasına 34,3 milyon manat), 51,0 milyon manatı ərazilərin minalardan təmizlənməsinə, 34,5 milyon manatı sosial təyinatlı layihələrin (təhsil, səhiyyə, mədəniyyət və bu kimi digər sosial tədbirlərə), 27,9 milyon manatı isə digər tədbirlərin icrasına yönəldilib.
Aparılmış təhlillər, eləcə də əvvəlki və cari ilin büdcə icrası prosesində müvafiq istiqamətdə xərclərə dəyişikliklərin edilməsi təcrübəsi və büdcə-vergi siyasətinin istiqamətləri ilə bağlı məlumatlar növbəti ildə də müvafiq məsələnin aktual olacağı barədə qənaətə gəlməyə imkan verir.
Qeyd edək ki, 2024-cü il üzrə “İşğaldan azad olunmuş ərazilərin yenidən qurulması və bərpası” tədbiri xərclərinin təhlili bu xərc üzrə artım istiqamətində düzəlişlərin və ya icra prosesində digər xərc istiqamətlərindən qənaətin yönəldilməsi ehtimalının yüksək olduğunu deməyə imkan verir.
Şahidi olduğunuz hadisələri çəkib bizə göndərin!
Son Əlavə