Bakı Ağır Cinayətlər Məhkəməsində Bakı şəhər sakinləri Vüqar Əlizadə və İlham Əliyevin CM-nin 120.2.1-ci (qəsdən adam öldürmə, qabaqcadan əlbir olan bir qrup şəxs tərəfindən törədildikdə) və 120.2.2-ci (qəsdən adam öldürmə, xuliqanlıq niyyəti ilə törədildikdə) maddəlləri ilə təqsirləndirilmələrinə dair cinayət işi məhkəmə prosesi başa çatıb.

Median.Az xəbər verir ki, 2016-cı il noyabrın 28-də DİN məlumat yayıb ki, Maştağa qəsəbəsində yaşayan Vüqar Əlizadə (1994-cü il təv.) tanışı Kamran Quliyevə (1993-cü il təv.) bıçaqla zərbələr vuraraq, onu qətlə yetirib. Cinayəti törədən şəxs Sabunçu RPİ 14-cü polis bölməsinin əməkdaşları tərəfindən saxlanılıb. Fakta görə rayon prokurorluğunda CM-nin 120.1-ci (qəsdən adam öldürmə) maddəsi ilə cinayət işi başlanılıb.

İstintaqın gedişatında məlum olub ki, hər iki şəxs fərdi qaydada fəhləliklə məşğul olub, Kamran Vüqardan bir müddət əvvəl borca 150 manat pul alıb. Ayın 27-də növbəti dəfə qəsəbədə görüşərkən sonuncu tanışından təkidlə borcunu tələb edib, lakin Quliyev imkanının olmadığını və ona bir neçə gün möhlət verməsini xahiş edib. Bununla Əlizadə razılaşmayıb, ona kifayət qədər gözlədiyini deyib. Bir-birinin ünvanına işlətdikləri söyüşlərdən sonra, əlbəyaxa dava başlayıb və Vüqar Kamrana 12 bıçaq zərbəsi endirərək, onu qəsdən öldürüb.

İstintaqın gedişatında təqsirləndirilən şəxs qismində cinayət məsuliyyətinə Vüqar Əlizadəyə kömək edən tanışı İlham Əliyev də cəlb olunub.


Məhkəmənin hökmü ilə təqsirləndirilən şəxslərin hər biri 17 il müddətinə azadlıqdan məhrumetmə cəzalarına məhkum olunublar.скачать dle 11.3