Bakı Apellyasiya Məhkəməsində Mirzağa Məmmədovun CM-nin 124.1-ci (ehtiyatsızlıqdan adam öldürmə) və 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddəlləri ilə məhkum olunmasına dair cinayət işi üzrə məhkəmə prosesi başlayıb.
Median.Az xəbər verir ki, ötən il dekabrın 20-də Binəqədi rayonu ərazisində yerləşən “Köhnə Bakı” kafesində ofisiant işləyən Mirzağa Məmmədov aralarında yaranmış mübahisə zəminində müştəri, Çingiz Qədirliyə (1999-cu il təv.) bıçaqla ağır xəsarətlər yetirib. Respublika Klinik Xəstəxanasına çatdırılan gənc orada kəskin qanitirmədən dünyasını dəyişib. Onun öldüyünü eşidən yaxınları xəstəxanaya gələrək, mühafizəçiyə xəsarətlər yetiriblər, xəstəxananın qapılarını və şüşələrini sındırıblar. Çağırış əsasında hadisə yerinə Yasamal RPİ Post-Patrul Xidmətinin əməkdaşları cəlb olunaraq, asayişi bərpa ediblər.
Cinayəti törədən Mirzağa Məmmədov həmin axşam Binəqədi RPİ-nin əməkdaşları tərəfindən şübhəli saxlanılıb və istintaqa təqdim olunub. İbtidai istintaq təqsirləndirilən şəxsə CM-nin 120.2.2-ci (xuliqanlıq niyyəti ilə qəsdən adam öldürmə) maddəsi ilə ittiham verib.
Bakı Ağır Cinayətlər Məhkəməsinin hökmü ilə M.Məmmədov 9 il müddətinə azadlıqdan məhrumetmə cəzasına məhkum olunub. Onun ittiham olunduğu CM-nin 120.2.2-ci maddəsi 124.1-ci (ehtiyatsızlıqdan adam öldürmə) maddəsinə tövsif edilib.
Xatırladaq ki, dövlət ittihamçısı təqsirləndirilən şəxsə 20 il cəza təyin olunmasını xahiş edib.
Hökmdən prokuror apellyasiya protesti, zərərçəkmiş şəxsin hüquqi varisi apellyasiya şikayəti verib.
Bakı Apellyasiya Məhkəməsində ilkin baxış zamanı M.Məmmədovun anket məlumatları dəqiqləşdirilib.
İş üzrə baxış dekabrın 28-nə təyin edilib.
Şahidi olduğunuz hadisələri çəkib bizə göndərin!
Son Əlavə