Tanımadığı insanı küçədə bıçaqladığına görə 7 il cəza aldı - FOTO

Bakı Apellyasiya Məhkəməsində Bakı şəhər sakini Ruslan Səfərovun CM-nin 126.2.4 (qəsdən sağlamlığa ağır zərər vurma, ümumi təhlükəli üsulla, xuliqanlıq niyyəti ilə törədildikdə) və 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddələri ilə apellyasiya şikayəti üzrə məhkəmə prosesi başa çatıb.

Median.Az xeber verir ki, ötən ilin dekabr ayında Ruslan Səfərov bir neçə tanışı ilə Xətai rayonunda gecə saat 3 radələrində səs-küy salıb, ucadan söyüş söyüb. Buna görə həmin ərazidə yaşayan Elvin İsmayılov onlara iradını bildirib. Aralarında yaralanan mübahisə zamanı Ruslan Səfərov Elvin İsmayılova bıçaqla xəsarətlər yetirib, vaxtında xəstəxanaya çatdırılan zərərçəkmişin həyatını həkimlər xilas ediblər. Səhərisi gün Səfərov Xətai RPİ-nin əməkdaşları tərəfindən saxlanılıb.

Məhkəmə prosesində Ruslan Səfərov ittiham üzrə özünü təqsirli bilib və əməlindən peşman olduğunu bildirib.

Bakı Ağır Cinayətlər Məhkəməsinin hökmü ilə R.Səfərov 7 il müddətinə azadlıqdan məhrumetmə cəzasına məhkum olunub.

Hökmdən məhkum apellyasiya şikayəti verib.

Bakı Apellyasiya Məhkəməsi işin hallarını araşdıraraq, şikayəti təmin etməyib və hökmü dəyişdirilmədən saxlayıb.