“Real Madrid” ulduzu beş il müddətinə həbs oluna bilər

Xorvatiya prokurorluğu “Real Madrid” futbol klubunun xorvatiyalı ulduz yarımmüdafiəçisi Luka Modriçə qarşı cinayət işi açıb.

Oxu.az “Večernji list”ə istinadən xəbər verir ki, Xorvatiya futbol millisinin üzvü məhkəməyə yalan ifadələr verməkdə ittiham olunur.

Günahı sübuta yetirilərsə, onu beş ilədək azadlıqdan məhrumetmə cəzası gözləyə bilər.

Məhkəməyə ittihamnaməni təqdim edən prokurorluq hesab edir ki, Modriç, Zdravko Mamiçə qarşı istintaqa yalan məlumatlar çatdırıb. “Dinamo” Zaqreb futbol klubunun keçmiş rəhbəri Mamiç, Modriçin “Totenhemə” satışından əldə olunan gəlirin bir hissəsini mənimsəməkdə ittiham olunur.

İstintaqın gedişində futbolçu ifadəsini dəyişməklə, öz işini sözün əsl mənasında müşkülə salıb.

Yalan ifadə verməkdə eyni zamanda Modriçin milli yığmadakı komanda yoldaşı Deyan Lovren ittiham olunur.