Günəşdə yenidən partlayışlar qeydə alınıb

Günəşdə bir müddət davam edən sakitlikdən sonra aktivlik yenidən artmağa başlayıb. Alimlər ulduzda yeni ləkələrin yarandığını və ilk alışmaların qeydə alındığını bildirib.

Bu barədə Rusiya Elmlər Akademiyasının Kosmik Tədqiqatlar İnstitutunun (İKİ RAN) Günəş Astronomiyası Laboratoriyası məlumat yayıb.

Alimlərin sözlərinə görə, ötən həftə Günəş aktivliyi sıfır səviyyəsinə qədər düşsə də, hazırda tədricən bərpa olunur. Günəş səthində yeni ləkələr yaranıb, bununla yanaşı tacın orta temperaturu da yüksəlməyə başlayıb.

Mütəxəssislər bildirirlər ki, noyabrın 4-də artıq iki zəif Günəş alışması qeydə alınıb. Onların gücü C1.1 və C1.2 sinifləri ilə qiymətləndirilib.

Laboratoriyanın məlumatına əsasən, yaxın iki gün ərzində Günəşdə alışma aktivliyinin əvvəlki səviyyəsinə qayıtması gözlənilir. Bununla belə, hazırkı aktivlik ümumilikdə çox zəif hesab olunur.

Alimlər geomaqnit sahəsinin də hazırda sakit vəziyyətdə olduğunu qeyd ediblər.

Mütəxəssislər hazırkı dalğalanmaların səbəbinin tam aydın olmadığını bildirirlər. Ehtimallara görə, buna noyabrın 1-dən 2-nə keçən gecə baş vermiş G2 səviyyəli geomaqnit qasırğasının təsirləri səbəb ola bilər.

Hazırkı proqnozlara əsasən, yaxın müddətdə ciddi geomaqnit pozuntusu gözlənilmir.