TƏBİB Səhiyyə Nazirliyinə verildi: Xəstələri və xəstəxanaları nə gözləyir?

Azərbaycanda səhiyyə sisteminin idarə olunması ilə bağlı yeni qərar qəbul edilib. Prezident İlham Əliyevin imzaladığı Fərmana əsasən, Tibbi Ərazi Bölmələrini İdarəetmə Birliyi (TƏBİB) Səhiyyə Nazirliyinin tabeliyinə verilib.

Dəyişiklik səhiyyə sahəsində idarəetmə mexanizmlərinin yenidən qurulmasını və qurumlar arasında səlahiyyət bölgüsünü yenidən gündəmə gətirir. Bəs bu qərar dövlət tibb müəssisələrinin fəaliyyətinə, səhiyyə sistemində idarəetmənin səmərəliliyinə və vətəndaşlara göstərilən tibbi xidmətlərin keyfiyyətinə necə təsir edəcək?

Mövzu ilə bağlı Median.Az-a açıqlama verən həkim-terapevt Məlahət Hümmətqızı bildirib:
"Azərbaycan Respublikasının prezidenti cənab İlham Əliyevin imzaladığı bu fərman, səhiyyə sistemimizdə idarəetmənin təkmilləşdirilməsi baxımından çox mühüm və müsbət bir addımdır"

Mütəxəssisin fikrincə, TƏBİB-in Səhiyyə Nazirliyinin tabeliyinə verilməsi, ilk növbədə qurumlar arasında səlahiyyət bölgüsünü dəqiləşdirəcək. Bu dəyişikliyi dövlət xidmətlərində geniş tədbiq olunan "pəncərə" sistemi ilə də əlaqələndirmək olar. Yəni, vətəndaş üçün bu proseslər sadələşəcək, idarəetmədə vahidlik təmin olunacaq, qərar qəbul etmə sürətlənəcək və bürokratik maneələr aradan qaldırılacaq.

Məlahət Hümmətqızı qeyd edib ki, ən əsası, bu islahat dövlət tibb müəssisələrində fəaliyyətin daha yaxşı koordinasiya olunmasına, resursların düzgün bölüşdürülməsinə və nəticə etibarilə vətəndaşlara göstərilən tibbi xidmətin keyfiyyətinin daha yüksək səviyyə çatmasına xidmət edəcək.

Həkim sonda vurğulayıb ki, bu qərar Azərbaycan səhiyyəsini daha dayanıqlı, müasir çağırışlara cavab verən və vətəndaşyönümlü bir sistemə çevirəcək. Dövlətin bu istiqamətdə atdığı adımlar gələcəkdə səhiyyə sahəsində daha böyük uğurlara zəmin yaradacaq.

Dəniz Pənahova
Median.Az