Təxminən 30 ildir açılmamış qalan Tupak Şakurun qətli ilə bağlı məhkəmədə andlılar heyəti qərarını verib. Keçmiş dəstə lideri Dueyn “Keffi D” Devis təqsirli bilinib.

Amerikalı reper Tupak Amaru Şakurun 1996-cı ildə Las-Veqasda öldürülməsi ilə bağlı məhkəmə prosesi başa çatıb. Uzun illər çoxsaylı sui-qəsd nəzəriyyələrinin mövzusuna çevrilən qətllə bağlı andlılar heyəti 63 yaşlı keçmiş dəstə lideri Dueyn “Keffi D” Devisi təqsirli bilib.

Andlılar heyəti üç saata qərar verdi

Las-Veqasdakı Klark dairəsi regional məhkəməsində keçirilən prosesdə andlılar heyəti təxminən üç saatlıq müzakirədən sonra Devisi Tupak Şakurun ölümündəki roluna görə qətldə təqsirli hesab edib. Bununla da 7 sentyabr 1996-cı ildə törədilən qətllə bağlı ilk məhkumluq qərarı çıxarılıb.

Qərar elan edilərkən qara kostyum geyinmiş Devis ifadəsiz şəkildə dayanıb. Təqsirləndirilən şəxs qərardan sonra apellyasiya şikayəti verəcəyini bildirib. Tupakın ailə üzvləri isə məhkəmə zalında göz yaşlarını saxlaya bilməyiblər. Məhkəmə Devisin cəza ilə bağlı dinləməsini oktyabrın 13-nə təxirə salıb.

Tupaka ağ “Kadillak”dan atəş açılıb

Tupak Şakur karyerasının zirvəsində olduğu vaxt, 25 yaşında həyatını itirib. 7 sentyabr 1996-cı il gecəsi Şakur və onun səsyazma şirkətinin təsisçisi Marion “Suq” Nayt Las-Veqasda “MGM Grand” otelində keçirilən Mayk Taysonun boks görüşünü izləyiblər.

Onların olduğu avtomobil işıqforun qırmızı işığında dayandığı zaman yaxınlaşan ağ rəngli “Kadillak”dan atəş açılıb. Ağır yaralanan Tupak xəstəxanaya çatdırılıb, lakin hücumdan altı gün sonra vəfat edib.

Qətlin həmin gecə Şakurun dəstəsi ilə Devisin qardaşı oğlu Orlando Anderson arasında baş verən davadan sonra qisas məqsədilə törədildiyi iddia olunub.

Prokurorluq: Əmri Devis verib

Prokurorlar Devisin atəşi açan şəxs olmadığını, lakin hücumu təşkil etdiyini və Andersonun istifadə edəcəyi silahı təmin etdiyini bildiriblər.

Devisin qətl gecəsi ağ rəngli “Kadillak”ın içində olduğunu illər ərzində verdiyi müxtəlif açıqlamalarda etiraf etdiyi qeyd olunub.

Həmçinin Devisin 2019-cu ildə yayımlanan “Compton Street Legend” adlı xatirə kitabında hadisə ilə bağlı etiraflara yer verdiyi bildirilib. Prokurorluq müxtəlif illərdə qeydə alınmış dörd ayrı söhbətdən ümumilikdə səkkiz saatlıq audio materialı da məhkəməyə sübut kimi təqdim edib.

İş üzrə prokuror Binu Palal yekun çıxışında Devisin illər ərzində sənədli filmlərdə, xatirələrində, radio proqramlarında və polis dindirmələri zamanı Tupakın öldürülməsindəki rolundan danışdığını bildirib.

Devisin müdafiəsi: heç bir sübut yoxdur

Devisin vəkilləri isə müvəkkillərinin illər ərzində verdiyi açıqlamaların həqiqəti əks etdirmədiyini müdafiə ediblər. Müdafiə tərəfi Devisin kitab satmaq və pul qazanmaq məqsədilə hekayələri şişirtdiyini iddia edib.

Devisin vəkili Maykl Sanft məhkəmədə “Heç bir sübut yoxdur” deyə müdafiə mövqeyini ifadə edib.

30 illik sirr sona çatdı

Tupak Şakurun öldürülməsi 1990-cı illərdə ABŞ-də Şərq və Qərb sahillərinin rep səhnələri arasındakı rəqabətin ən qaranlıq hadisələrindən biri kimi tarixə düşüb. Qətl uzun illər ərzində çoxsaylı sui-qəsd nəzəriyyələrinin mərkəzində olub.

Dünya üzrə 75 milyondan çox albom satan Tupakın yaradıcılığı onun ölümündən sonra da musiqi dünyasına təsir göstərməkdə davam edib. İllərdir açılmamış qalan qətl işi üzrə Devis haqqında çıxarılan məhkumluq qərarı istintaqda tarixi dönüş nöqtəsi hesab olunur.
//qaynar.azскачать dle 11.3