Məktəblərdə gender disbalansı: Kişi müəllimlərin azlığı şagirdlərə necə təsir edir? - VİDEO

Azərbaycan məktəblərində gender disbalansı davam edir: hazırda ümumi müəllim heyətinin cəmi 18 faizini kişilər təşkil edir. Məktəbəqədər, ümumi orta və orta ixtisas təhsili müəssisələrində qadın pedaqoqların payı 80 faizə, məktəbəqədər təhsil müəssisələrində isə 99.9 faizə çatır.

Median.Az xəbər verir ki, bu barədə Baku TV-nin videomaterialında deyilir.

Ekspertlərin fikrincə, bu vəziyyət uşaqların şəxsiyyət kimi formalaşmasına, sosiallaşmasına və təhsilin keyfiyyətinə mənfi təsir göstərir. Uşaqların həm evdə, həm də təhsil müəssisələrində əsasən qadınların əhatəsində böyüməsi oğlan şagirdlərin kişi rol modelini daha az görməsinə səbəb olur.

Problemin həlli istiqamətində ilk addımı Bakı Slavyan Universiteti atıb. Ali məktəb ibtidai sinif müəllimliyi və xarici dil müəllimliyi ixtisaslarına 450-dən yuxarı bal toplayaraq qəbul olan oğlan tələbələrə xüsusi təqaüd verəcək.

Sosiologiya üzrə fəlsəfə doktoru Üzeyir Şəfiyev bu qərarı təqdirəlayiq addım kimi qiymətləndirib.

O bildirib ki, həm kişi, həm də qadın pedaqoqların özünəməxsus keyfiyyətləri var və təlim-tərbiyə prosesində tərəflərdən birinin üstünlük təşkil etməsi balanslı psixoloji mühiti zəiflədir.

Sosioloq vurğulayıb ki, təhsil sistemindəki bu disbalansın tənzimlənməsi üçün stimullaşdırıcı tədbirlər davam etdirilməlidir.