Benzinlə bağlı mühüm açıqlama: Qiymətlər…

Azərbaycanın Aİ-92 markalı avtomobil benzininin xarici bazarlara tədarükü ilin ilk altı ayında əhəmiyyətli dərəcədə genişlənib. Yanvar-iyun dövründə ölkədən 5 365 ton Aİ-92 benzini ixrac olunub və bu satışlardan 4,36 milyon ABŞ dolları gəlir əldə edilib. Ötən ilin müvafiq dövrü ilə müqayisədə ixracın dəyəri 2,3 dəfə, fiziki həcmi isə 72 faiz artıb. Bununla yanaşı, hesabat dövründə Aİ-92 benzininin idxalında 96 faizlik kəskin azalma qeydə alınıb.

Məsələ ilə bağlı iqtisadçı Natiq Cəfərli Median.Az-a açıqlamasında deyib ki, bu yanacaq növünün Avropaya ixracatı mümkün deyil, çünki Avropa standartlarına uyğun deyil:

“Sadəcə, bizdə neftayırma zavodlarında təmir işləri başa çatdı və indi daha çox istehsal etməyə başlayıblar. Bu, pozitiv bir gəlişmədir. Çox güman ki, bu, Ermənistana satdığımız benzinin də, qonşu ölkələrə, o cümlədən Gürcüstana satdığımız benzinin də bir hissəsini əhatə edir. Yəni biz nə qədər çox neft məhsulları ixrac ediriksə, bir o qədər çox gəlir əldə edirik. Çünki neft məhsulu xam neftdən daha çox gəlir gətirir. Amma həcm artsa da, ümumi dəyəri o qədər də çox deyil. Hələ 4,3 milyon ABŞ dolları civarında olan bir satışdır. Bunu da dediyim kimi, böyük əksəriyyəti çox güman ki, Ermənistana satdığımız yanacaqdır”.

Aysel Elnur