Avqust ayının ortalarına yaxınlaşsaq da, Azərbaycanda havanın bəzi günlərdə gözləniləndən daha sərin keçməsi diqqət çəkir. Bu il yay mövsümündə güclü istilərin əvvəlki illərlə müqayisədə daha az müşahidə olunması da suallar yaradır.

Bəs avqust ayında temperaturun belə dəyişməsi mövsüm üçün nə dərəcədə normaldır? Havanın sərinləşməsi müvəqqəti xarakter daşıyır, yoxsa qarşıdakı günlərdə temperatur yenidən yüksələcək? Azərbaycanda yaxın günlərdə isti hava dalğasının müşahidə olunması gözlənilirmi?

Məsələ ilə bağlı Median.Az-ın suallarını cavablandıran ekoloq Cavid Hüseynov bildirib ki, avqust ayı coğrafi olaraq ilin ən isti dövrlərindən biri hesab olunur və adətən güclü günəş radiasiyası ilə səciyyələnir.
"Lakin bu o demək deyil ki, ayın hər günü eyni dərəcədə isti olmalıdır. Meteoroloji baxımdan yaz və yay fəsillərinin müəyyən dövrlərində şimal enliklərindən (məsələn, Rusiyanın cənub rayonları və ya Qara dəniz hövzəsi üzərindən) bölgəyə daxil olan nisbətən sərin hava axınları və atmosfer cəbhələri temperaturun qısamüddətli enməsinə səbəb olur", — deyə ekoloq əlavə edib.
Cavid Hüseynovun sözlərinə görə, bəzi illərdə bu cür sərin hava dalğaları iqlim normasından bir qədər aşağı temperaturların qeydə alınması ilə nəticələnir. Bu, uzunmüddətli iqlim dəyişikliyi fonunda baş verən təbii sinoptik dalğalanmalardır və tamamilə istisna olunan qeyri-adi təbiət hadisəsi deyil.
Ekoloq qeyd edib ki, sinoptik proqnozlar göstərir ki, müvəqqəti sərinləşmə yaradan hava axınları tədricən zəiflədikcə, subtropik isti hava kütlələri yenidən bölgəyə təsir göstərə bilər.

Ekoloq sonda vurğulayıb ki, son illərdə qlobal iqlim dəyişmələri fonunda yay mövsümlərində qısamüddətli sərinlik və ardınca gələn güclü istilər kimi dinamik dalğalanmalar müşahidə olunur.

Dəniz Pənahova
Median.Azскачать dle 11.3