“Apple”-ın “iPhone 18” seriyasının təqdimat strategiyasını dəyişəcəyi ilə bağlı iddialar təsdiqlənib. Şirkətin yeni modelləri eyni vaxtda deyil, fərqli tarixlərdə təqdim edəcəyi bildirilir.

Məlumata görə, “iPhone 18 Pro” və “iPhone 18 Pro Max” bu ilin sentyabrında keçiriləcək tədbirdə təqdim olunacaq. “Apple”-ın ilk qatlanan smartfonu kimi gözlənilən “iPhone Ultra” modelinin də həmin tədbirdə nümayiş etdiriləcəyi iddia olunur.

Standart “iPhone 18”və “iPhone 18e” modellərinin isə sentyabr tədbirində təqdim edilməyəcəyi bildirilir. Bu cihazların 2027-ci ilin martında keçiriləcək tədbirdə, “iPhone Air 2”ilə birlikdə təqdim olunacağı gözlənilir.

Bu məlumat “Apple”-ın əsas təchizatçılarından biri olan Pegatronun açıqlamasından sonra gündəmə gəlib. Şirkət ikinci rüb üzrə maliyyə nəticələrini açıqlayarkən bəzi müştərilərin fərqli tədarük və göndəriş cədvəllərinə keçəcəyini bildirib. Tayvanın “Economic Daily News” nəşri isə söhbətin “Apple”-dan getdiyini və bunun daha əvvəl yayılan iddialarla üst-üstə düşdüyünü yazıb.

İddialara görə, “Apple”-ın təqdimat cədvəlini dəyişməsinin əsas səbəblərindən biri son aylarda yaşanan komponent çatışmazlığı və təchizat problemləridir. Şirkətin mövcud resursları ilk növbədə premium modellərin istehsalına yönəltmək üçün standart “iPhone 18”-in təqdimatını təxirə saldığı bildirilir.

Beləliklə, “Apple”-ın sentyabr tədbirində “iPhone 18 Pro”, “iPhone 18 Pro Max” və qatlanan “iPhone Ultra” modellərini təqdim edəcəyi, standart “iPhone 18”, “iPhone 18e” və “iPhone Air 2” modellərinin isə 2027-ci ilin martında nümayiş etdiriləcəyi gözlənilir.
//sfera.azскачать dle 11.3