6 yeni “iPhone” modeli hazırlanır

“Apple”-ın iOS 27 beta 5 versiyasında aşkarlanan gizli sistem kodları şirkətin 6 yeni “iPhone” modeli üzərində çalışdığını ortaya qoyub.

Kodlarda “iPhone 18 Pro”, “iPhone 18 Pro Max”, “iPhone 18”, “iPhone 18e”, “iPhone Air 2” və qatlanan ekranlı olması gözlənilən “iPhone Ultra” modellərinin adları aşkarlanıb.

Batareya sistemlərindəki kodlar yeni modellərin daha inkişaf etmiş enerji idarəetməsi ilə yanaşı, qatlanan ekran və iki batareyalı quruluş kimi texnologiyaları dəstəkləyəcəyinə işarə edir.

“iPhone”-lar mərhələli təqdim ediləcək

İddialara görə, “Apple” bu il təqdimat strategiyasını dəyişəcək. Payızda əvvəlcə “iPhone 18 Pro”, “iPhone 18 Pro Max” və ilk qatlanan model olması gözlənilən “iPhone Ultra” təqdim ediləcək.

“iPhone 18” və “iPhone 18e” modellərinin isə 2027-ci ilin əvvəllərində satışa çıxarılması gözlənilir.

“Apple” hələlik bu məlumatları rəsmi şəkildə təsdiqləməyib.
//sfera.az