İllər əvvəl tamaşaçıların böyük marağına səbəb olan “Yeni ulduz” musiqi layihəsi yenidən ekranlara qayıdır. “SOY” prodakşının ərsəyə gətirdiyi layihənin bu dəfə ARB TV-də yayımlanacağı gözlənilir. Layihənin yenidən gündəmə gəlməsi həm nostalji hisslər yaradır, həm də televiziya məkanında musiqi yarışmalarına marağın yenidən artdığını göstərir.

Media eksperti, Əməkdar jurnalist Azər Həsrət  Median.Az-a açıqlamasında “Yeni Ulduz” yarışmalarına maraqla baxdığını deyib:

“Baxmayaraq ki, sahəm fərqlidir, amma incəsənətdir, musiqidir, bu, hamı üçün var, o cümlədən bizim üçün də. Diqqətlə, maraqla baxırdıq. Yəni, tamaşaçıları həqiqətən də cəlb eləyirdi və televiziyanın qarşısında bəlli bir auditoriya formalaşdırmışdı. Düşünürəm ki, onun geri qaytarılması, yenidən ekrana çıxması televiziyaya marağı bir qədər də artıra biləcək. Bundan savayı da, o yarışmanın qalibləri, yaxud iştirakçıları arasında çox sayda istedadlı gənclər vardı. O gənclər artıq ölkənin incəsənətinə, Azərbaycanın incəsənətinin, mədəniyyətinin tanınmasına xidmət edirlər, məşhurlaşıblar, yaxşı oxuyurlar. Yəni, həqiqətən də istedadlı gənclər üzə çıxdı”.

O qeyd edib ki, belə bir yarışmanın davamlı şəkildə keçirilməsi Azərbaycanda, özəlliklə də yetişməkdə olan nəslin mədəniyyətə, incəsənətə gəlişinə əlavə imkanlar yarada bilər:

“Eyni zamanda, bu, həm də televiziyaya tamaşaçıların qayıtmasını təmin edəcək. Əlbəttə, tam olaraq deyil, qismən. Və üstəlik də, indiki sosial media şəraitində düşünürəm ki, bu yarışmanın yayımlanması həqiqətən də çox ciddi təkan verəcək proseslərə. Yəni, mədəniyyət sahəsində. Yaxşı ifaları dinləyirik, seçilənləri izləyirik və əlbəttə ki, seçənlərin də kimliyinə diqqət yetiririk. “Yeni Ulduz”un bundan sonrakı həyatı da uğurlu olar”.

Aysel Elnurскачать dle 11.3