Rusiya Ermənistana şərt qoydu

Ermənistanın kənd təsərrüfatı məhsullarının Rusiya bazarına tədarükünün bərpası yalnız məcburi təhlükəsizlik tələblərinə tam əməl olunduğu təqdirdə mümkündür.

Median.Az "Vedomosti" nəşrinə istinadən xəbər verir ki, bu barədə Rusiyanın kənd təsərrüfatı naziri Oksana Lut Avrasiya İqtisadi İttifaqının (Aİİ) Aqrosənaye Siyasəti üzrə Şurasının Almatıda keçirilən VII iclası çərçivəsində Ermənistanın iqtisadiyyat naziri Gevorq Papoyan ilə görüşünün yekunlarına əsasən bəyan edib.

Rusiya Kənd Təsərrüfatı Nazirliyi məhsulların təhlükəsizliyinin təmin edilməsi üçün əsas tələblər sırasında Ermənistan istehsalçılarının öz xammalından istifadə etməsini, pestisidlərə nəzarəti və tədarüklərin izlənilməsini qeyd edib.

Lut vurğulayıb ki, Rusiya tərəfi üçün mütləq prioritet göndərilən məhsulların Aİİ-nin baytarlıq və fitosanitariya normalarına uyğunluğudur. Rusiya tərəfi, həmçinin göndərilən məhsulların təhlükəsizliyinə nəzarəti təmin edəcək və qüvvədə olan normalara əməl olunmasına zəmanət verəcək alqoritmin hazırlanmasının vacibliyini qeyd edib.

Xatırladaq ki, mayın sonunda "Rosselxoznadzor" Ermənistandan güllərin idxalına qadağa qoyub, həmçinin təzə pomidor, xiyar, göyərti və çiyələk tədarükünü məhdudlaşdırıb. İyunun 2-dən etibarən məhdudiyyətlər Rusiyaya ixrac üçün nəzərdə tutulan albalı, üzüm və diri balığa da şamil edilib. İyunun 3-də qurum bu tədbirləri alma, armud, badımcan, kartof və quru meyvələrə də tətbiq edib. İyunun 26-da "Rosselxoznadzor" Ermənistandan balıq məhsullarının tədarükünə qoyulan məhdudiyyətləri genişləndirib. İyulun 27-dən isə qurum süd məhsullarının idxalını məhdudlaşdırıb.