Bildiyimiz kimi, Azərbaycanda avqustun 1-dən kartdan-karta köçürmələrə yeni limitlər tətbiq olunub. Gündəlik əməliyyat sayının 5-lə məhdudlaşdırılması və aylıq 20 min manatlıq limit cəmiyyətdə müzakirələrə səbəb olub. Rəsmi açıqlamalara görə, dəyişikliklərin məqsədi maliyyə təhlükəsizliyini və şəffaflığı artırmaq, dələduzluq hallarının qarşısını almaqdır. Bəs yeni qaydalar vətəndaşların gündəlik əməliyyatlarına necə təsir edəcək? Gündəlik 5 köçürmə limiti kifayət edirmi və bu məhdudiyyətlər dələduzluq hallarının azalmasına real təsir göstərə bilərmi?

Məsələ ilə bağlı Median.Az-a açıqlama verən iqtisadçı Natiq Cəfərli bildirib ki, bu cür məhdudiyyətlərə beynəlxalq təcrübədə rast gəlinmir.



"Belə bir nümunə dünyada yoxdur. Bu cür qərarlar qəbul edilərkən hansısa ölkənin təcrübəsi əsas götürülübmü? Məncə, xeyr. Araşdırmışam, lakin buna bənzər məhdudiyyətlərin tətbiq olunduğunu görməmişəm", – deyə o, qeyd edib.

İqtisadçının sözlərinə görə, yeni qaydalar əksinə, nağd ödənişlərin və vəsaitlərin nağdlaşdırılmasının artmasına səbəb ola bilər.

"İnsanlar indiyədək pullarını rahat şəkildə kartda saxlayır, heç bir problem olmadan kartdan-karta köçürmələr edirdilər. Məsələn, mən özüm də gün ərzində yaxınlarıma alış-veriş üçün kart vasitəsilə pul göndərirdim", – deyə N.Cəfərli deyib.

Ekspert hesab edir ki, istənilən məhdudiyyət alternativ davranış formaları yaradır.

"Əgər hökumət düşünürsə ki, bu addım qeyri-leqal maliyyə əməliyyatlarının və ya vergidən yayınmanın qarşısını alacaq, əks nəticə verə bilər. İnsanlar sadəcə kartda pul saxlamaq əvəzinə, vəsaitlərini bankomatdan nağdlaşdırıb üzərlərində daşıyacaqlar. Bu isə nağdsız ödənişlərin inkişafı baxımından geriyə dönüş deməkdir. Belə məhdudlaşdırıcı addımlarla vergi və digər problemləri həll etmək mümkün deyil", – deyə iqtisadçı vurğulayıb.

Dəniz Pənahova
Median.Azскачать dle 11.3