"Telegram" 1 milyard istifadəçi üçün kriptocüzdan istifadəyə verəcək

"Telegram" mesajlaşma platforması tətbiqinə mərkəzləşdirilməmiş kriptovalyuta cüzdanını inteqrasiya etməyə hazırlaşır.

Şirkətin təsisçisi və baş direktoru Pavel Durov bildirib ki, yeni cüzdan bu yayın sonuna qədər istifadəyə veriləcək və tətbiqin ayrılmaz hissəsi olacaq.

Onun sözlərinə görə, yeni həll sayəsində 1 milyarddan çox istifadəçi ani kriptovalyuta köçürmələri həyata keçirə və komissiyasız əməliyyatlardan yararlana biləcək.

"Mərkəzləşdirilməmiş Gram cüzdanı birbaşa "Telegram" tətbiqinə inteqrasiya olunacaq. Beləliklə, ani kriptovalyuta köçürmələri və sıfır əməliyyat haqqı reallığa çevriləcək", - deyə Durov bildirib.

Hazırda "Telegram"da "Wallet" adlı kriptovalyuta cüzdanı mövcuddur və onun 150 milyondan çox istifadəçisi var. Lakin bu xidmət mini-tətbiq kimi fəaliyyət göstərir və bir sıra ölkələrdə istifadə üçün şəxsiyyət təsdiqi (KYC) tələb olunur.

Yeni cüzdan isə birbaşa "Telegram"a inteqrasiya ediləcək. İstifadəçilər əlavə tətbiq yükləmədən və ya ayrıca quraşdırma aparmadan bu funksiyadan istifadə edə biləcəklər. Bu da platformanın bütün istifadəçilərinin avtomatik olaraq kriptovalyuta cüzdanına çıxış əldə etməsi deməkdir.
//valyuta.az