Ağıllı saatla dənizdə üzmək olarmı?

Müasir ağıllı saatların əksəriyyəti müəyyən səviyyədə suya davamlılıq xüsusiyyətinə malikdir. Lakin bu, onların dənizdə uzun müddət və problemsiz istifadə edilə biləcəyi demək deyil.

Ağıllı saatlarda suya davamlılığı göstərən əsas standartlar IP və WR/ATM sistemləridir. Məsələn, IP68 və ya 5–10 ATM göstəricisi olan cihazlar müəyyən qədər su təzyiqinə davam gətirə bilir. Lakin bu göstəricilər əsasən şirin su və nəzarətli laboratoriya şəraiti üçün nəzərdə tutulur.

Dəniz suyu isə tərkibindəki duz səbəbindən cihazlar üçün daha təhlükəli hesab olunur. Duz saatın metal hissələrində korroziyaya səbəb ola kontaktlara, dinamiklərə və mikrofonlara zərər verə bilər. Həmçinin duz kristalları düymələrin və qoruyucu hissələrin altında toplanaraq su keçirməzliyə mənfi təsir göstərə bilər.

Bundan əlavə, üzgüçülük zamanı dalğalar, əl hərəkətləri və suyun yaratdığı əlavə təzyiq saatın üzərinə düşən yükü artırır. Buna görə də istehsalçının göstərdiyi suya davamlılıq göstəricisi hər zaman dənizdə aktiv istifadə üçün zəmanət vermir.

Mütəxəssislər tövsiyə edirlər ki, dənizdə istifadə edildikdən sonra ağıllı saat mütləq təmiz su ilə yuyulsun və tam qurudulsun. Su səbəbindən yaranan nasazlıqlar isə çox vaxt zəmanət çərçivəsinə daxil edilmir.

Buna görə də hətta yüksək suya davamlılıq sertifikatına malik ağıllı saatlardan istifadə edərkən dənizdə üzmək riskli hesab olunur. Ən təhlükəsiz seçim isə dənizə girərkən cihazı çıxarmaqdır.
//sfera.az