Yasamalda məhəlləyə qoyulan şlaqbaumu FHN sökdürsə də, sakinlər yenidən quraşdırıb - FOTO

Yasamalda vətəndaş özbaşınalığı onun qonşularına baha başa gəlir.

Paytaxtın Yasamal rayonu Əbdürrəhim bəy Haqverdiyev küçəsində yeni tikilən göydələnlə onun paralelindəki tikilinin arasında şlaqbaum quraşdırılıb. Saytın qaynar xəttinə şikayət edən Yasamal sakini bildirir ki, quraşdırılan şlaqbaumla bağlı dəfələrlə müvafiq qurumlara şikayət etsə də, sonda yalnız Fövqəladə Hallar Nazirliyi məsələyə əl atıb. Hətta qurumun müraciəti əsasında 157 saylı Mənzil Kommunal İstismar Sahəsinin əməkdaşları tərəfindən şlaqbaum yığışdırılıb. Lakin bir müddət sonra ərazidə yaşayan Rəşad Rüstəmov, Elşən Həsənov və digər sakinlər tərəfindən şlaqbaum yenidən quraşdırılıb.

Hətta may ayında yenidən quraşdırılan şlaqbaum üçün aidiyyəti qurumlara müraciət də edib. Buna baxmayaraq, hələ də hansısa qurum tərəfindən reaksiya verilməyib. Vətəndaş iddia edir ki, aidiyyəti qurumlardan birinin əməkdaşı ona şlaqbaumun heç vaxt sökülməyəcəyini də deyib.

Bununla yanaşı, şikayətçi qeyd edib ki, yaranmış vəziyyətlə bağlı hətta Yasamal Rayon İcra Hakimiyyətinin rəhbərliyinə də məktub ünvanlayıb. Buna baxmyaraq, hələ də icra başçısı vətəndaşı qəbul etməyib.