Bakıda qadın “Massimo Dutti”, “Oysho” və “Stradivarius”dan bahalı paltarlar oğurlayıb

Bakıda “Crescent Mall” və “28 Mall” ticarət mərkəzlərində fəaliyyət göstərən “Massimo Dutti”, “Oysho” və “Stradivarius” mağazalarından ümumilikdə 4345 manat dəyərində paltar oğurlayan 1984-cü il təvəllüdlü qadın cinayət məsuliyyətinə cəlb olunub.

Bəturə Eyvazova (ad-soyad şərtidir) sözügedən mağzalara daxil olarkən paltarların üzərinə bərkidilmiş mühafizə qurğusunu (maqnit) özü ilə gətirdiyi xüsusi texniki vasitə olan dəmir alətlə söküb.

Məlum olub ki, 42 yaşlı qadın maqniti açan açarı Bakıda mağazaların birindən 20 manat ödəyərək əldə edib.

Məhkəmə istintaqı zamanı Bəturə Eyvazova ona qarşı elan olunmuş ittiham üzrə özünü təqsirli bilib. O, oğurladığı paltarları tanıdığı şəxslərə satdığını bildirib.

Məlum olub ki, Bəturə həmin adamlara sözügedən mağazalarda rəfiqələrinin işlədiyini, paltarları endirimlə ala biləcəyini deyib. Paltar almaq istəyən şəxslər isə sadəcə, həmin mağazalara baxış keçirib bəyəndikləri paltarların şəklini çəkərək Bəturəyə göndərməli imiş.

Bəturə Eyvazova növbəti oğurluqdan sonra “28 Mall” ticarət mərkəzinin qapısında təhlükəsizlik xidmətinin əməkdaşları tərəfindən saxlanılıb. 

Məhkəmənin hökmünə əsasən, 42 yaşlı qadının azadlığı üç il müddətinə məhdudlaşdırılıb.
Qeyd edək ki, adıçəkilən mağazalar eyni şirkətin struktur bölməsidir.
//ann.az