Bu qidalar qocalmanı sürətləndirir

Yanlış qidalanma vərdişləri bioloji qocalmanı sürətləndirə bilər.

Bu barədə neyrobioloq David Koks məlumat verib.

Onun sözlərinə görə, həddindən artıq emal olunmuş qidaların istehlakı, normadan artıq kalori qəbulu və orqanizmin ehtiyac duyduğu qida maddələrinin kifayət qədər alınmaması piylənmə, diabet, metabolik xəstəliklər və erkən yaşlarda xərçəng riskini artırır. D.Koks qeyd edib ki, son illərdə bu xəstəliklərin daha gənc yaşlarda müşahidə olunması sürətlənmiş bioloji qocalmanın göstəricisidir.

Neyrobioloq bildirib ki, düzgün qidalanma qocalma prosesini ləngitməyə kömək edə bilər. O, gündə ən azı beş porsiya meyvə və tərəvəz istehlak etməyi, yaşıl yarpaqlı tərəvəzlərə, liflə zəngin və təbii qidalara üstünlük verməyi, həmçinin hər əsas qida qəbulunda kifayət qədər zülal qəbul etməyi tövsiyə edib.

Mütəxəssisin sözlərinə görə, həftədə üç dəfə qızılbalıq kimi yağlı balıq yemək orqanizmin omeqa-3 yağ turşularına olan tələbatını qarşılamağa kömək edir və bunun DNT səviyyəsində qocalmanı yavaşlada biləcəyini göstərən elmi araşdırmalar mövcuddur.

Alim həmçinin günün ən vacib qidasının axşam deyil, səhər və ya günorta qəbul edilməsinin daha faydalı olduğunu vurğulayıb. O bildirib ki, insan orqanizmi günün ilk yarısında qidaları daha səmərəli həzm edir.

D.Koks əlavə edib ki, maqnezium və sink kimi minerallar insulin müqavimətinin qarşısının alınmasında mühüm rol oynayır. Bu minerallar ispanaq, qoz-fındıq, tam taxıllı məhsullar, ət, süd məhsulları və dəniz məhsullarında bol miqdarda mövcuddur. \\milli.az