2030-cu il haqqında yayılan iddialar nə dərəcədə realdır?

Son illər sosial şəbəkələrdə, ekspert dairələrində və müxtəlif beynəlxalq hesabatlarda 2030-cu ilin dünyada mühüm dəyişikliklərlə yadda qalacağı barədə fikirlər tez-tez səsləndirilir. Süni intellektin sürətli inkişafı, iqlim dəyişiklikləri, əmək bazarındakı transformasiya və qlobal iqtisadi proseslər bu müzakirələrin əsas mövzuları sırasındadır. Bəs həqiqətənmi bəşəriyyəti qarşıdakı illərdə yeni dünya düzəni gözləyir, yoxsa bu proqnozların bir hissəsi şişirdilmiş gözləntilərdən ibarətdir?

Dünyada 2030-cu ildə böyük dəyişikliklərin olacağından bəhs edirlər. 2030-cu il Azərbaycan üçün necə olacaq, nələr gözləyir bizi?

Mövzu ilə bağlı Median.Az-a açıqlama verən iqtisadçı Eldəniz Əmirov bildirib ki, hazırki vəziyyətdə mövcud proqnozların böyük əksəriyyəti publika üçün müəyyən məqsədlərə xidmət edən proqnozlardır.
Eldəniz Əmirovun sözlərinə görə, ayrı-ayrı lider dövlətlərin başçılarının proqnozları, beynəlxalq maliyyə təsisatlarının səsləndirdiyi fikirlər, onların hesabatlarında səsləndirilən proqnozlar demək olar ki, özünü doğrultmur.

"Əgər 10-15 il əvvəl 3-5 illik proqnozlar verilirdisə, bu gün hətta 1 illik səsləndirilən proqnozlar belə özünü doğrultmur. Məsələn, ilin sonunda növbəti il üçün proqnozlar verilir. 2025-ci ilin sonunda Dünya Bankı, ÜST və yaxud da Valyuta Fondu proqnozlar verir, ilin yarısına çatmamış həmin proqnozlar 3-4 dəfə dəyişdirilir. Yəni, hər ay proqnozlar yenilənir", — deyə iqtisadçı əlavə edib.

Eldəniz Əmirov sonda vurğulayıb:

"Bu, onu deməyə əsas verir ki, əslində bu proqnozlar özünü doğrultmaq iqtidarında deyil. Çünki dünya o qədər dinamik olur ki, prosesləri proqnozlaşdırmaq olmur. O cümlədən də Yeni Dünya Düzəni ilə bağlı proseslər barədə də birmənalı fikir söyləmək mümkün deyil.
Fikrimcə, 2030-cu il bu günkü vəziyyətdən hər hansısa bir situasiya ilə fərqlənməyəcək".

Dəniz Pənahova
Median.Az