2030-cu ilə qədər süd istehsalının 10 faiz, mal əti istehsalının isə 20 faizdən çox artırılması hədəflənir. Cins heyvanların sürüdə payının azı 4 dəfə artırılması nəzərdə tutulur. Süd və mal əti üzrə özünütəminetmə səviyyəsinin yüksəldilməsi də əsas hədəflərdəndir. Bu hədəflərə çatmaq üçün südlük və ətlik klasterlərin yaradılması, klasterlər daxilində müxtəlif tutuma malik 1000-ə yaxın yeni təsərrüfatın formalaşdırılması və həmin təsərrüfatların cins damazlıq heyvanlarla təmin edilməsinin dəstəklənməsi nəzərdə tutulur.

Bu sözləri kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramının müzakirəsi məqsədilə Qubada keçirilən regional müşavirədə kənd təsərrüfatı nazirinin müavini Seymur Səfərli deyib.

“Bundan əlavə, 90 süd toplama və 15 dəri toplama məntəqəsinin yaradılması dəstəklənəcək. Bu, heyvandarlıqda yalnız istehsalın deyil, eyni zamanda tədarük, emal və satış zəncirinin qurulmasına xidmət edir. İribuynuzlu heyvanların identifikasiyasının aparılması da mühüm tədbirlərdəndir. Heyvanların identifikasiyası xəstəliklərə nəzarət, damazlıq işinin təşkili, məhsuldarlığın izlənilməsi və dövlət dəstəyi mexanizmlərinin şəffaf tətbiqi baxımından vacibdir”, - deyə o əlavə edib.скачать dle 11.3