Meyvələrin sağlamlıq üçün faydaları danılmazdır. Lakin onların şirin və ya turş halda istehlak edilməsinin daha faydalı olub-olmaması ilə bağlı fikirlər müxtəlifdir.

Mütəxəssislərin sözlərinə görə, meyvələr yetişdikcə tərkibindəki nişasta təbii şəkərlərə çevrilir. Bu da onların daha şirin olmasına səbəb olur. Tam yetişmiş meyvələr orqanizm tərəfindən daha asan həzm edilir və enerji mənbəyi kimi faydalıdır.

Bununla yanaşı, turş və ya tam yetişməmiş meyvələrin də üstünlükləri var. Dietoloqlar bildirirlər ki, belə meyvələrdə şəkər miqdarı nisbətən az, lif miqdarı isə daha çox olur. Bu xüsusiyyət qanda şəkərin sürətlə yüksəlməsinin qarşısını almağa kömək edə bilər.

Həkimlər qeyd edirlər ki, limon, qreyfrut, kivi və bəzi alma növləri kimi turş meyvələr C vitamini və antioksidantlarla zəngindir. Bu maddələr immun sisteminin güclənməsinə və orqanizmin sərbəst radikallardan qorunmasına dəstək verir.

Mütəxəssislər vurğulayırlar ki, mədə turşuluğu və həzm sistemi problemləri olan şəxslər turş meyvələri ehtiyatla istehlak etməlidirlər. Əks halda, bu məhsullar mədə yanması və digər narahatlıqlara səbəb ola bilər.

Araşdırmalara görə, meyvənin şirin və ya turş olması onun faydalılığını müəyyən edən əsas amil deyil. Əsas məsələ meyvələrin gündəlik qidalanmada kifayət qədər yer tutması və müxtəlif növlərinin istehlak edilməsidir.

Mütəxəssislər balanslı qidalanma üçün həm şirin, həm də turş meyvələrin rasiona daxil edilməsini tövsiyə edirlər.скачать dle 11.3