35 valideyn hüquqlarından məhrum edilib - Kamran Əliyev

Prokurorluq orqanlarının təşəbbüsü ilə son illərdə onlarla valideynin valideynlik hüququ məhdudlaşdırılıb və ya onlardan məhrum edilməsi ilə bağlı məhkəmələrə müraciət olunub.
 
Bu barədə Baş prokuror Kamran Əliyev “Azərbaycanda yeniyetmələrin hüquq düşüncəsi” tədqiqat hesabatının və “Uşaqlar və hüquq” kitabının təqdimat mərasimində çıxışı zamanı məlumat verib.
 
O bildirib ki, 2024-cü ildə qanunvericiliyə edilən dəyişikliklərdən sonra prokurorlara valideynlik hüququndan məhrum etmə və ya həmin hüququn məhdudlaşdırılması ilə bağlı məhkəmələrdə mülki iddia qaldırmaq səlahiyyəti verilib.
 
Baş prokurorun sözlərinə görə, bu müddət ərzində prokurorluq tərəfindən məhkəmələrə 37 belə iddia təqdim olunub. Həmin iddialardan 35-i təmin edilib, 2-si isə hazırda baxılma mərhələsindədir.
 
Kamran Əliyev vurğulayıb ki, valideynlik hüququndan məhrumetmə son çarə kimi tətbiq edilir:
 
“Bu, kifayət qədər ağrılı prosesdir. Belə qərarlar qəbul edilməzdən əvvəl aidiyyəti dövlət qurumları, hüquq-mühafizə orqanları və digər məsul strukturlarla geniş müzakirələr aparılır. Yalnız uşağın mənafeyini qorumaq üçün başqa çıxış yolu qalmadıqda bu addım atılır”.
 
Baş prokuror əlavə edib ki, uşaqların hüquqlarının müdafiəsi prokurorluğun fəaliyyətində prioritet istiqamətlərdən biridir.
//sfera.az