"WhatsApp" mesencerində mesaj silmənin yeni rejimi sınaqdan keçirilir. Bu rejim aktiv edildikdə, mesajın silinməsi üçün nəzərdə tutulan taymer yalnız qarşı tərəf mətni oxuduqdan sonra işə düşəcək.

Bu barədə "MacRumors" portalı məlumat yayıb.

Yeni funksiya tətbiqin "iOS" əməliyyat sistemi üçün nəzərdə tutulan və "TestFlight" platformasında yerləşdirilən son beta versiyasında aşkarlanıb.

Hazırkı sistemdə taymer mesaj göndərildiyi andan etibarən geri saymağa başlayır. Yeni rejimdə isə silinmə vaxtı yalnız mesaj oxunduqdan sonra aktivləşir. Bu funksiya çərçivəsində istifadəçilərə 5 dəqiqə, 1 saat və 12 saat variantları təklif olunur. Qeyd edək ki, oxşar imkan artıq bir neçə ildir ki, "Telegram" mesencerində uğurla istifadə edilir.

Sözügedən yenilik tətbiqin sazlamalar menyusundakı "Default message timer" (Standart mesaj taymeri) bölməsində yerləşdirilib. Lakin funksiyanın rəsmi təqdimatı zamanı adının və ya menyudakı yerinin dəyişdirilə biləcəyi istisna olunmur.

Yeni alət artıq "iOS" və "Android" platformalarında beta istifadəçilərinin müəyyən bir qismi üçün əlçatandır. Hətta bəzi standart (sabit) versiya istifadəçilərinin də artıq bu funksiyaya çıxış əldə etdiyi bildirilir.

Silinən mesajlar funksiyası bütün yeni çatlar üçün standart parametr kimi də təyin oluna bilər və ucdan-uca şifrələmə (end-to-end encryption) təhlükəsizlik sistemini tam dəstəkləyir. Bu yeniliyin şəxsi məlumatlarının məxfiliyinə xüsusi önəm verən istifadəçilər üçün faydalı olacağı və cihazların daxili yaddaşının dolmasının qarşısını alacağı gözlənilir.скачать dle 11.3