Şəffaf telefon örtükləri niyə zamanla saralır və bulanıqlaşır?

Şəffaf telefon örtükləri stil və minimalizm effekti yaratsa da, istifadəçilər zamanla örtüklərin saraldığını və bulanıqlaşdığını görürlər. Bu problem yalnız müasir smartfon istifadəçilərinə aid deyil – 20 il əvvəl də, düyməli telefonlardan istifadə edənlər belə bu vəziyyətlə qarşılaşıb.

Qaynarinfo xəbər verir ki, BGR ekspertləri açıqlayıb ki, örtüklərin saralması və şəffaflığını itirməsi sadəcə çirkdən qaynaqlanmır, əsas səbəb materialın təbii olaraq istismar müddətini itirməsidir. Çox vaxt şəffaf örtüklər silikon və ya termoplastik poliuretan materialından hazırlanır və bu materiallar zamanla ətraf mühitlə reaksiya verir. Nəticədə baş verən oksidləşmə prosesi plastik örtüyün rəngini dəyişir.

Saralmanı sürətləndirən bir neçə faktor mövcuddur:

- Günəş işığı və ultrabənövşəyi şüalar materialın strukturunu zəiflədir.
- Əllə davamlı təmas – dəri yağları, tərləmə və təbii yağlar örtüyün səthində toplanır və zamanla bulanıqlıq yaradır.
- Ətraf mühit amilləri – çirkli hava, siqaret tüstüsü və təmizləyici sprey də örtüyün rənginə təsir edir.

Ekspertlər bildirir ki, bu prosesi tamamilə dayandırmaq mümkün deyil, amma onu yavaşlatmaq mümkündür. Bunun üçün örtüyü müntəzəm təmizləmək və uzun müddət birbaşa günəş işığına məruz qoymamaq tövsiyə olunur.

Əgər örtük artıq saralmağa başlayıbsa, onu yumaqla bərpa etmək olar. Ən sadə üsul – örtüyü isti suda, az miqdarda qab yuyan vasitə ilə isladıb, sonra yumşaq fırça ilə səthini təmizləməkdir. Bu üsul örtüyün səthindəki çirki və ləkələri aradan qaldırır.

Daha mürəkkəb hallarda qida sodası həlli istifadə olunur – örtük 30 dəqiqə həllin içində saxlanır, sonra təmizlənir. Lakin ekspertlər qeyd edir ki, bu üsullar həmişə orijinal şəffaflığı bərpa etmir, çünki dəyişikliklərin bir qismi materialın daxilində baş verir.