"Qış dövründə kişi sağlamlığı üçün kiçik çanaq nahiyəsinin soyuması, fiziki aktivliyin azalması, yüksək kalorili qidalanma və D vitamini çatışmazlığı risk yaradır".

Bu barədə "İzvestiya" nəşrinə "SM-Klinika" Reproduktiv Sağlamlıq Mərkəzinin həkim-uroloq-androloqu Artur Boqatıryev məlumat verib.

Onun sözlərinə görə, soyuq mövsümdə soyuqlamaq kifayət qədər asandır, lakin kişilər üçün xüsusi təhlükə məhz kiçik çanaq nahiyəsinin soyumasıdır:

"Şaxtada uzun müddət qalmaq, xüsusilə də kifayət qədər isti geyim olmadıqda, sidik-cinsiyyət sistemində iltihabi proseslərə - sistit, uretrit və prostatitə səbəb ola bilər", - deyə Boqatıryev qeyd edib.

Həkim bildirib ki, digər mühüm amil fiziki aktivliyin azalmasıdır. Qısa gündüz saatları və soyuq hava kişilərin daha çox qapalı məkanda vaxt keçirməsinə səbəb olur. Hərəkətsizlik balanssız qidalanma ilə birlikdə kiçik çanaq orqanlarında qanın durğunluğuna gətirib çıxarır ki, bu da prostat vəzinin qan təchizatını pisləşdirə bilər.

Bundan əlavə, uroloq vurğulayıb ki, soyuq mövsümdə bir çox insan daha kalorili, yağlı və şirin qidalar qəbul etməyə başlayır. Lakin lif və vitamin çatışmazlığı fonunda bu, çəki artımına və ümumi sağlamlıq vəziyyətinin pisləşməsinə səbəb ola bilər. Bu amillər isə kişi reproduktiv sisteminə mənfi təsir göstərir.

"Qış aylarında bir çox proseslərin, o cümlədən cinsi sistemin fəaliyyətinin tənzimlənməsində iştirak edən D vitamini çatışmazlığı riski artır. Əlavələrin qəbulu məsələsi mütləq həkimlə məsləhətləşərək həll olunmalıdır, çünki özbaşına qəbul təhlükəli ola bilər", - deyə ekspert əlavə edib.

Boqatıryev sonda qeyd edib ki, isti geyim, müntəzəm hərəkət, balanslı qidalanma, zərərli vərdişlərdən imtina və vaxtında diaqnostika kişi sağlamlığının qorunmasında mühüm rol oynayır:

"Profilaktika hər zaman artıq inkişaf etmiş xəstəliklərin müalicəsindən daha effektivdir".
//oxu.azскачать dle 11.3