“Android”dən yenilik - Təhlükəsizlik gücləndiriləcək

“Google”, “Android” sistemində təhlükəsizliyi gücləndirən yeni funksiyanı, “Təcili Durum Canlı Videosunu” istifadəyə verdiyini açıqlayıb. Bu yenilik sayəsində istifadəçilər təcili vəziyyətlərdə ilk yardım və xilasedici qruplarla real vaxtda video bağlantısı quraraq anlıq görüntüləri paylaşa biləcəklər.



Sfera.az xəbər verir ki, şirkətin məlumatına görə, bu sistemin məqsədi yol qəzaları, yanğınlar və ya tibbi fövqəladə hallar zamanı müdaxilə komandalarına hadisə yerindən daha dəqiq və operativ məlumat ötürməkdir.



Beləliklə, xilasetmə qrupları hadisə yerinə çatmazdan əvvəl vəziyyəti qiymətləndirə biləcək, istifadəçilər isə operatorların görüntülü təlimatları ilə ilkin müdaxiləni həyata keçirə biləcəklər.


Yeni xüsusiyyətin istifadəsi üçün əlavə quraşdırma və ya xüsusi tənzimləmə tələb olunmur. Təcili zəng zamanı operatorun göndərdiyi istəyi qəbul etmək kifayətdir. Bundan sonra qurğu şifrələnmiş, təhlükəsiz və istənilən an dayandırıla bilən canlı video yayımına başlayır.


“Google” bildirib ki, bu funksiyanı “Android 8” və daha yeni versiyaları dəstəkləyən bütün smartfonlarda aktivləşdirmək mümkün olacaq. Sistem ilkin mərhələdə ABŞ, Almaniya və Meksikanın seçilmiş bölgələrində istifadəyə veriləcək.


Şirkət yeni texnologiyanın təcili yardım sahəsində operativliyi artıracağını və həyat qurtarma prosesini daha effektiv edəcəyini vurğulayıb.