"Siyasi mənada Ermənistan və Azərbaycan arasındakı münaqişə başa çatıb, lakin sosial-psixoloji ölçüdə davam edir".
Median.Az-ın Ermənistan KİV-ə istinadən məlumatına görə, bu barədə hökumət başçısı Nikol Paşinyan illik "Orbeli: Sülh və çoxtərəfli əməkdaşlıq quruculuğu" beynəlxalq forumunda çıxışı zamanı bildirib.
Paşinyanın sözlərinə görə, iki ölkə arasında artıq sülh qurulub, lakin əsas çətinlik indi diplomatiyada deyil, yeni reallığı dərk etməkdədir.
"Mən sülh haqqında danışanda bu, çoxuna qəribə və hətta yad görünür. Sülh - Ermənistan və Azərbaycan üçün tanış olmayan anlayış və yeni mühitdir", - deyə baş nazir bildirib.
Onun sözlərinə görə, münaqişənin davam etdiyi onilliklər ərzində hər iki tərəf bir-birini yalnız qarşıdurma prizmasından qəbul etməyə öyrəşib. SSRİ-nin dağılmasından sonra məhz münaqişə hər iki ölkənin siyasi sistemlərinin, ictimai əhvali-ruhiyyəsinin və milli kimliyinin formalaşdığı amil olub.
"Müstəqillik əldə etdikdən sonra bizim cəmiyyətlər sülhün nə olduğunu bilmirdilər. Münaqişə bizim düşüncəmizi, siyasətimizi və xalqlar arasındakı münasibətləri müəyyən edirdi", - deyə baş nazir qeyd edib.
Onun sözlərinə görə, buna görə də münaqişənin siyasi mənada başa çatması ictimai şüurun dərhal dəyişməsi demək deyil. Uzun illər davam edən düşmənçiliyin aradan qaldırılması vaxt, dialoq və qonşuluğun qəbuluna yeni yanaşmalar tələb edir.
"Sosial-psixoloji qavrayışı bir qərarla dəyişmək və ya "söndürmək" olmaz", - deyə Paşinyan vurğulayıb.
Şahidi olduğunuz hadisələri çəkib bizə göndərin!
Son Əlavə