Naxçıvan Hərbi Məhkəməsində hakim təqsirləndirilən hərbçilərə prokurorun istədiyi cəzadan daha artıq cəza təyin etdi - FOTO

Naxçıvandakı N Saylı Hərbi hissədə milyonluq aksiz markası olmayan tütün məmulatlarının oğurlanmasında təqsirləndirilən hərbçilərin məhkəməsi yekunlaşıb.

Median.Az-ın Naxçıvana ezam olunmuş əməkdaşının verdiyi məlumata görə, Naxçıvan Hərbi Məhkəməsində hakim Səxavət Hüseynovun sədrliyi ilə keçirilən prosesdə dövlət ittihamçısı ittiham nitqi ilə çıxış edib. Dövlət ittihamçısı məhkəmədən təqsirləndirilən şəxslər Cəmil Allahverdiyevin 6 il, Şahbaz Məmmədovun 3 il, Fərhad Şükürovun 6 il 6 ay, Murad Şükürovun 5 il 6 ay və Vüsal Mehdizadənin isə 5 il 6 ay müddətinə azadlıqdan məhrumetmə, Aməd Qasımov, Nihat Sadıqov, Elcan Hüseynzadə və Amil Ibrahimovun isə 2 il müddətinə şərti cəza verilməsini məhkəməyə təklif edib. Daha sonra vəkillərin müdafiə çıxışları oldu. Təqsirləndirilən şəxslərin vəkilləri dəymiş ziyanın tam ödənildiyini, həmçinin işin digər hallarını nəzərə alaraq müvəkkillərinə daha yüngül cəza verilməsini məhkəmədən xahiş etdilər. Təqsirləndirilən şəxslərdən Cəmil Allahverdiyevin vəkili Yusif Seyfəlov bildirdi ki, ibtidai istintaq zamanı cinayət işi ilə bağlı ətraflı araşdırma aparılmayıb. Bir çox məsələlər qaranlıq qalıb. Və bu boşluqların aradan qaldırılması üçün məhkəməyə təqdim edilən 9 əsaslı vəsatət təmin edilərək araşdırılmalı idi. Lakin çox təəssüf ki məhkəmə həmin vəsatətlərin heç birini təmin etmədi. Vəkil onu da vurğulayıb ki, məhkəmə təcrübəsində bu növ əmlak xarakterli cinayətlər üzrə zərər ödənildikdə belə ağır cəzaların verilməsi çox nadir hallarda görünür. Verilmiş cəza ilə qəti şəkildə razılaşmır və obyektiv həqiqətə nail olunmasından ötrü apellyasiyaya şikayətilə Apellyasiya Məhkəməsinə müraciət olunacaq. Təqsirləndirilən şəxlər son söz deyərək məhkəmədən daha yüngül və ədalətli hökm çıxarmasını xahiş ediblər. Müşavirədən qayıdan məhkəmə hökmü elan edib. Hökmə əsasən, təqsirləndirilən şəxslər dövlət ittihamçısı tərəfindən 6 il cəza istənilmiş Cəmil Allahverdiyev 7 il, 3 il istənilmiş Şahbaz Məmmədov 4 il, 6 il 6 ay istənilmiş Fərhad Şükürov 7 il, 5 il 6 ay istənilmiş Murad Şükürov 6 il və 5 il 6 ay istənilmiş Vüsal Mehdizadə 6 il 6 ay müddətinə azadlıqdan məhrum edildilər, Aməd Qasımov, Nihat Sadıqov, Elcan Hüseynzadə və Amil Ibrahimovun isə 2 il müddətinə şərti cəza verildi. Qeyd edək ki, Naxçıvanda N saylı hərbi hissədə aksiz markası vurulmayan tütün məmulatları hərbi hissənin mülkiyyətinə mədaxil edilib,daha sonra isə oğurlanıb. Adıçəkilən şəxslər də həmin məmulatların oğurlanmasında təqsirləndirilir.Onlara qarşı Cinayət Məcəlləsinin 177.2.1, 177.2.2-ci (oğurluq - qabaqcadan əlbir olan bir qrup şəxs tərəfindən törədildikdə və təkrar törədildikdə), 177.2.3-cü (oğurluq - yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla törədildikdə), 177.2.4-cü (oğurluq - xeyli miqdarda ziyan vurmaqla törədildikdə), 177.3.2-ci (oğurluq - külli miqdarda ziyan vurmaqla törədildikdə) və 311.2-ci (Vəzifəli şəxs tərəfindən qanunsuz hərəkətlərə (hərəkətsizliyə) görə rüşvət alma) maddəsi ilə ittiham irəli sürülüb.



Orxan Rasifoğluскачать dle 11.3

Şahidi olduğunuz hadisələri çəkib bizə göndərin!