"iFixit" mütəxəssisləri amerikalı istehlakçılara artan texnologiya qiymətlərinə qarşı tədbir olaraq smartfon və digər cihazları təmir etməyi öyrənməyi tövsiyə ediblər.

Bu təklif cihazların təmiri üçün təlimatlar hazırlayan və xüsusi alətlər istehsal edən təşkilatın rəsmi saytında dərc olunub.

Mütəxəssislərin sözlərinə görə, ABŞ-nin tətbiq etdiyi yeni gömrük rüsumları və qarşılıqlı məhdudiyyətlər səbəbi ilə smartfon, kompüter və digər texnoloji qurğuların qiymətlərində artım gözlənilir. Bu səbəbdən istehlakçılara öz cihazlarını ev şəraitində təmir etməyi öyrənmək məsləhət görülür.

"Keyfiyyətli ehtiyat hissələri və alətlər də bahalaşacaq, lakin ümumilikdə təmirin dəyəri yeni cihaz almaqdan xeyli ucuz başa gələcək", - deyə "iFixit" evdə təmirin üstünlüklərini vurğulayıb.

Mütəxəssislər həmçinin qeyd ediblər ki, istehsalçılar da bu prosesi dəstəkləməli, daha asan təmir olunan cihazlar istehsal etməli və istifadəçilər üçün ətraflı təmir təlimatları təqdim etməlidirlər.

"Təmir təkcə yaxşı biznes deyil, həm də dayanıqlı iqtisadiyyat və gələcək üçün həyati əhəmiyyət daşıyır. Bu gün təmir hər zamankından daha vacibdir", - deyə "iFixit" nümayəndələri bildiriblər.
//oxu.azскачать dle 11.3