Azərbaycan Qida Təhlükəsizliyi Agentliyi (AQTA) tərəfindən həyata keçirilən nəzarət tədbirləri zamanı cari dövr ərzində ölkəmizə idxal olunan bir sıra qida məhsullarında uyğunsuzluqlar aşkarlanıb və müəyyən olunan konkret faktlar üzrə zəruri tədbirlər görülüb. Aşkarlanan uyğunsuzluqlarla bağlı tənzimləmə tədbirləri çərçivəsində xaricdə fəaliyyət göstərən bəzi şirkətlərdən ölkəmizə məhsul idxalına qadağa tətbiq olunub.

Bu barədə AQTA məlumat yayıb.

Bildirilib ki, Ukraynanın "Shidzahid", "Zagotservice", "Myasador", "VKP Verbovskoye" istehsalçı şirkətlərinin dondurulmuş mal əti məhsullarında, həmçinin bu ölkənin "Lutskaya Agrarnaya Kompaniya" şirkətinin dondurulmuş toyuq budu məhsulunda aşkarlanan uyğunsuzluqlarla bağlı həmin şirkətlərdən ölkəmizə məhsul ixracına qadağalar tətbiq olunub.

Həmçinin Belarusun SP "Santa Bremor" istehsalçı şirkətinin hisə verilmiş balıq filesi, "Qrodnenskiy Myasokombinat OAO"nun dondurulmuş mal əti, Braziliyanın "Masterboi" istehsalçı şirkətinin dondurulmuş mal əti, Monqolustanın "Azat LLC" istehsalçı şirkətinin quzu əti, Rusiyanın "Miratorg-Kurs" istehsalçı şirkətinin isə donuzun dondurulmuş sümüksüz əti məhsullarında aşkarlanan uyğunsuzluqlarla əlaqədar müvafiq sağlamlaşdırıcı tədbirlərin görülməsi üçün sözügedən ölkələrin aidiyyəti qurumlarına bildiriş məktubları ünvanlanıb.скачать dle 11.3