"ChatGPT"nin yeni möhtəşəm funksiyası gəlir - VİDEO

"ChatGPT"də şəbəkədə mövcud olan böyük həcmli məlumatları ümumiləşdirməyə və mürəkkəb tədqiqat tapşırıqlarını yerinə yetirməyə imkan verən yeni funksiya işə salınır.

Bu barədə "OpenAI" şirkətinin saytında elan edilib.

Bildirilir ki, "Deep research" adlanan yeni proqram tədqiqatçı-analitik səviyyəsində tam hesabat yaratmaq üçün yüzlərlə onlayn mənbəni müstəqil şəkildə tapa, təhlil edə və ümumiləşdirə bilər.

Tərtibatçıların sözlərinə görə, bu bilikləri ümumiləşdirmək qabiliyyəti yeni biliyin formalaşması üçün ilkin şərtdir və ümumi süni intellektin inkişafı istiqamətində yeni addımı göstərir.

Proqram şəbəkədə məlumat axtarışı və məlumatların təhlili üçün optimallaşdırılmış "o3" modelinə əsaslanır.

Hazırda "dərin axtarış" yalnız "ChatGPT"nin "Pro" tarifi olan ödənişli abunəçiləri üçün mövcuddur, lakin gələcəkdə "Plus" və "Team" tarifli abunəçilər də ondan istifadə edə biləcəklər.

Yeni funksiya maliyyə, elm, siyasi idarəetmə, mühəndislik kimi sahələrdə intensiv əqli əməklə məşğul olan mütəxəssislər üçün xüsusilə faydalı olacaq.

Bundan əlavə, "Deep research" məhsul alışı zamanı potensial alıcıya bazarda mövcud olan seçimləri müqayisə etməkdə köməkçi rolunu oynaya bilər.

"Dərin axtarış"ın fərqləndirici xüsusiyyəti ChatGPT-nin sorğuya cavab hazırlaması üçün tələb olunan əhəmiyyətli vaxtdır - tapşırığın mürəkkəbliyindən asılı olaraq 5-30 dəqiqə. Bu zaman istifadəçi çatbotdan istifadə etməyə davam edə bilər. Verilən suala cavabla yanaşı, proqram təhlil zamanı görülən addımlar və istifadə edilən mənbələrə istinadlar haqqında məlumat da təqdim edəcək.
//oxu.az