İraq parlamenti uşaq evliliyini faktiki olaraq qanuniləşdirib.

Bu barədə "Associated Press" nəşri məlumat verib.

Məlumata görə, qanun dəyişiklikləri İslam məhkəmələrinə ailə məsələlərində, o cümlədən evlilik və boşanmalarda daha çox səlahiyyət verir.

İraqda əksər hallarda 18 yaş evlilik üçün minimum yaş olaraq qəbul edilir. Lakin yeni dəyişikliklər din xadimlərinə "öz İslam qanunlarına uyğun" qərarlar vermək imkanı tanıyır. Bəzi din xadimləri isə hesab edirlər ki, qızlar "erkən yaşlarda", hətta 9 yaşında ərə gedə bilərlər.

Fəallar iddia edirlər ki, bu dəyişikliklər İraqın 1959-cu ildə qəbul edilmiş və qadınların hüquqlarını qoruyan ailə qanununu pozur. Qanun dəyişikliklərini dəstəkləyən mühafizəkar şiə qanunvericilərinə görə isə, qanun "İslam prinsiplərinə uyğunlaşdırılıb" və bu, İraq mədəniyyətini "Qərb təsirindən" qoruyacaq.

Qeyd edək ki, BMT-nin 2024-cü il üçün açıqladığı statistikaya görə, İraqda qadınların təxminən 28%-i hələ yetkinlik yaşına çatmadan ailə qurur. Qanun qəbul olunmazdan əvvəl dini liderlər, azyaşlı qızlarla evliliyi onların atalarının icazəsi ilə qeydə alırdılar. Lakin belə evliliklər rəsmi sayılmırdı və bəzən qızları doğum evinə qəbul etməkdən imtina edilirdi.

Dəyişikliklər təsdiqlənməzdən əvvəl hüquq müdafiəçiləri xəbərdarlıq edirdilər ki, uşaq nikahlarının qanuniləşdirilməsi qızlar üçün fiziki və cinsi zorakılıq riskini artıracaq.скачать dle 11.3