“Əmək pensiyaları haqqında” qanuna təklif edilən dəyişiklik layihəsində başçısını itirmiş ailələrin sosial müdafiəsinin gücləndirilməsi məqsədilə onların pensiya təminatı ilə bağlı yeni humanist yanaşma əksini tapıb.

Əmək və Əhalinin Sosial Müdafiəsi Nazirliyindən verilən xəbərə görə, layihə qəbul edilərsə, başçısını itirməyə görə pensiya hüququ olan ailə üzvü bu və ya digər səbəblərdən (özünün digər növ pensiya və ya müavinət hüququ yaranması ilə və s. hallarda) payına düşən pensiya məbləğini almağa davam etmədikdə, ona hesablanan təqaüdün məbləği digər ailə üzvləri arasında bölüşdürüləcək.

Məsələn, başçısını itirməyə görə ailəyə ayda 420 manat pensiya ödənilir. Bu məbləğ ailənin üç nəfər üzvü arasında bölünərək (hər birinə 140 manat) verilir. Həmin şəxslərdən biri ayrıca pensiya və ya müavinət almağa başladıqda, onun payına düşən 140 manat vəsait qalan iki ailə üzvünün pensiyasının üzərinə (hər birinə 70 manat olmaqla) əlavə olunacaq.

Yeni qanun layihəsi hazırda aidiyyəti dövlət qurumları ilə müzakirə olunur.

Cari ilin əvvəlindən qüvvəyə minmiş digər bir qanunvericiliklə başçısını itirməyə görə ailəyə hüququ olduğu halda, nəzərdə tutulan iki sosial təminat növündən birini (ailə başçısını itirməyə görə pensiyanı və ya müavinəti) seçmək hüququ verilib.скачать dle 11.3