Nazirlik: İqlim dəyişmələri çaylarda su azalmasına səbəb olacaq

İqlim dəyişmələri nəticəsində Azərbaycanın çaylarında müəyyən faiz su azalması müşahidə ediləcək.

Bunu Ekologiya və Təbii Sərvətlər Nazirliyinin Ekoloji siyasət şöbəsinin sektor müdiri Mütəllim Əbdülhəsənov jurnalistlərə açıqlamasında bildirib.

Onun sözlərinə görə, iqlim dəyişmələrinin istənilən halda həssas ərazilərə təsiri böyükdür:

“Azərbaycan iqlim dəyişmələrinin təsirinə məruz qalan ölkələr siyahısındadır. Təbii ki, su ehtiyatlarının azalmasına iqlim dəyişmələri təsir göstərir. Gələcəkdə bu öz təsirini göstərə bilər. Amma ölkəmizdə bu sahədə strategiyalar, milli proqramlar qəbul edilib.

İqlim dəyişmələri nəticəsində Azərbaycanın çaylarında müəyyən faiz su azalması müşahidə ediləcək. Bu gün də çaylarımızda suyun azalmasının təzahürlərini görürük”.

Mütəllim Əbdülhəsənov bildirib ki, bu gün suvarmaya istifadə edilən suyun 50 faizə qədəri itkiyə gedir:

“Dünyada damcılı, çiləmə suvarmadan istifadəyə keçirilir. Azərbaycanda da bu istiqamətdə addımlar atılır. Ölkəmizdə suyun 30 faizi daxili çaylar hesabına formalaşır, 70 faizi kənardan çirklənmiş halda gəlir. Biz buna hazır olmalıyıq”.
//oxu.azскачать dle 11.3

Şahidi olduğunuz hadisələri çəkib bizə göndərin!