Bu gün Bakı Ağır Cinayətlər Məhkəməsində kikboks üzrə beşqat dünya çempionu Ehram Məcidovun cinayət işi üzrə məhkəmə iclası başlayıb.
Median.Az Report-a istinadən xəbər verir ki, hakim Eldar İsmayılovun sədrliyi ilə keçirilən prosesdə dəqiqləşdirilib.
Daha sonra E.Məcidovun vəkili vəsatət qaldırıb. O, cinayət işini araşdıran təhqiqatçının ifadəsinin sübutlar siyahısından çıxarılması və hadisə yerində olan əsas şahidin əlavə şahid qismində məhkəmədə dindirilməsini istəyib.
E.Məcidov da məhkəmədə çıxış edərək ona verilən ittihamla razılaşmayıb, işin yenidən istintaqa qaytarılmasını istəyib.
Məhkəmə E.Məcidovun vəsatətini təmin etməyib, vəkilin vəsatətləri isə hazırkı mərhələdə baxılmamış saxlanılıb.
Məhkəmənin baxış iclası fevralın 12-nə təyin edilib.
Qeyd edək ki, E.Məcidov "Neftçi" İSM-də kikboks bölməsinin baş məşqçisi olub. O, qayınatası Bəhruz Dilbazini döyməkdə ittiham edilir.
E.Məcidovun barəsində Cinayət Məcəlləsinin 126.2.4-cü (qəsdən sağlamlığa ağır zərər vurma, ümumi təhlükəli üsulla, xuliqanlıq niyyətilə) maddəsi ilə ittiham irəli sürülüb. Məhkəmənin qərarı ilə onun barəsində həbs qətimkan tədbiri seçilib.
Məlumata görə, E.Məcidov 2016-cı ildə həyat yoldaşı Müqəddə Dilbazi ilə boşanıb. Cütlüyün nikahından bir övladı olub. Uşaq ananın himayəsinə verilib. 2017-ci ildə isə M.Dilbazi məhkəməyə müraciət edərək uşağın xarici ölkəyə aparılmasına icazə verilməsini istəyib. Bununla bağlı E.Məcidovla arvadı arasında uzun sürən məhkəmə çəkişmələri də olub.
Son dövrdə isə E.Məcidov övladı ilə ünsiyyət qurmasına keçmiş həyat yoldaşı və onun valideynləri tərəfindən maneələr yaradıldığını bildirib. İdmançının bununla bağlı müraciətini Binəqədi rayon İcra şöbəsi araşdırıb. Hadisə də şöbənin inzibati binasında baş verib. İcra məmuru Vüqar Alıyevin otağında görüşən tərəflər atanın uşaqla görüşməsi ilə bağlı mübahisə ediblər.
İddiaya görə, E.Məcidovun keçmiş qayınatası B.Dilbazi məmurun otağında onu söyüb və kikboksçu qarşı tərəfə bir yumruq zərbəsi vurub.
Şahidi olduğunuz hadisələri çəkib bizə göndərin!
Son Əlavə