Azərbaycan Respublikasının Xarici İşlər Nazirliyi 15 oktyabr 2020-ci il tarixində Ermənistan silahlı qüvvələri humanitar atəşkəsi kobud şəkildə pozaraq, Azərbaycanın sıx məskunlaşmış yaşayış yerlərini və mülki şəxslərini məqsədyönlü atəşə tutmağa davam etməsi, səhər saatlarından etibarən, Azərbaycanın Ağdam, Ağcabədi, Goranboy və Tərtər rayonlarının artilleriya atəşinə məruz qalması ilə bağlı açıqlama verib.
XİN-in Mətbuat xidməti idarəsindən verilən məlumatda deyilir:
“Məqsədli şəkildə Azərbaycanlı mülki şəxsləri hədəfə alaraq, dinc insanların hər hansı fərq qoyulmadan qətl edilməsi halı olan bu akt, Ermənistanın törətdiyi növbəti barbarlıq və insanlıq əleyhinə cinayətidir.
Ermənistan tərəfindən humanitar atəşkəsin kobudcasına pozulması bir daha onu nümayiş etdirir ki, bu ölkə münaqişənin siyasi həllində maraqlı deyil və Azərbaycana qarşı təcavüz siyasətini davam etdirmək məqsədi güdür.
Ermənistanın təcavüzkar siyasətini və bu ölkənin təcavüzü zamanı törətdiyi müharibə cinayətlərini qətiyyətlə pisləyirik. Ermənistandan beynəlxalq hüququn norma və prinsiplərinə, o cümlədən beynəlxalq humanitar hüquq və Cenevrə Konvensiyaları ilə üzərinə götürdüyü öhdəliklərə hörmət etməyi tələb edirik.
Humanitar atəşkəsə sadiq olduğumuzu qeyd edərək, Azərbaycanın öz mülki əhalisini müdafiə etmək suveren hüququnu özündə saxladığını bəyan edirik”.
Qeyd edək ki, Ermənistan silahlı qüvvələrinin Tərtər rayonunda dəfn mərasimi zamanı qəbirstanlığı bilərəkdən atəşə tutması nəticəsində 4 mülki şəxs həyatını itirib, 5 nəfər isə ciddi xəsarət alıb.
Şahidi olduğunuz hadisələri çəkib bizə göndərin!
Son Əlavə