Fəhlə yoldaşını ehtiyatsızlıqdan güllələyən şəxsə hökm oxundu

Bərdə Rayon Məhkəməsində ehtiyatsızlıqdan sağlamlığa ağır zərər vurmada təqsirləndirilən Sənan Quliyevin (soyadı şərtidir) cinayət işi üzrə məhkəmə istintaqı yekunlaşıb.

Median.Az Pravda.az-a istinadla xəbər verir ki, hakim Gündüz Abbasovun sədrliyi ilə keçirilən prosesdə hökm oxunub.

Məhkəmənin hökmü ilə təqsirləndirilən şəxs zərərçəkmiş şəxslə barışdığından o, cinayət məsuliyyətindən azad edilib, cinayət işi üzrə cinayət təqibinə xitam verilib. Sənan Quliyevin barəsində seçilmiş polisin nəzarəti altına vermə qətimkan tədbiri ləğv olunub.

İttihama görə, hadisə 30 avqust 2024-cü il tarixdə, saat 00:30 radələrində Bərdə rayonu, Nifçi kəndinin ərazisində qeydə alınıb. Belə ki, orta dərəcə sərxoş vəziyyətdə olan Sənan Quliyev torpaq sahəsində həmkəndlisi, orta dərəcə sərxoş vəziyyətdə olan zərərçəkmiş Sərxan Məlikovla (soyadı şərtidir) birlikdə fəhlə qismində ot kipləri yığırmış. O, torpaq sahəsində çöl dovşanı ovlamaq məqsədi ilə ov tüfəngini üzərində gəzdirib və oturaqlı vəziyyətdə olan zaman ayağa durub. Bu zaman ehtiyatsızlıqdan barmağı həmin silahın çaxmağına dəyib. Nəticədə silahdan açdığı atəşdən yayılmış qırmalar ondan təqribən üç metr aralıda olan Sərxanın sağ bud nahiyəsinin qabaq səthinə dəyərək ona xəsarət yetirib.

Məhkəmədə zərərçəkmiş ifadəsində Sənandan heç bir şikayət və tələbi olmadığını, onunla barışdığını söyləyib.