Qadın parataekvandoçu: “Hələ də rəqibin hesabı 15:15-ə necə gətirdiyini fikirləşirəm”

“Hesabda 8:0 hesabı ilə öndə idim. Hələ də rəqibin hesabı 15:15-ə necə gətirdiyini fikirləşirəm”.

Bunu Bolqarıstanın paytaxtı Sofiyada keçirilən Avropa təsnifat turnirində Tokio Yay Olimpiya Oyunlarına lisenziya qazanmış parataekvondoçu Aynur Məmmədova deyib.

Bu gün Azərbaycan Taekvondo Federasiyasının rəhbərliyi ilə görüşdə iştirak edən Aynur Məmmədova bildirib ki, rəqibin hesabı bərabərləşdirdiyi gərgin döyüşdən sonra hələ də şokdadır:

“Həmin an sanki donmuşdum. Bir anlıq gözümün qarşısına gəldi ki, əziyyətlərimiz, bizə göstərilən dəstək boşa getdi. Sonda 15:15 hesabını saxlamağı düşünürdüm və bunu bacardım. Döyüş qızıl xala getdi. Həmin an var gücümlə zərbə vurdum və lazımi xalı qazandım. Bu mənə daha məsuliyyətli olmağı öyrətdi. Çünki qızıl xal uğrunda döyüş çox qorxuludur. Allaha şükür ki, bunu bacardım. Federasiyaya, müəllimlərimə təşəkkür edirəm. Hədəfim Paralimpiadada qızıl medal qazanmaqdır”.

Paralimpiya Oyunlarına lisenziya qazanmış digər parataekvondoçu Əbülfəz Abuzərli isə bildirib ki, bu uğurun ardı gəlməlidir: “Hər şeyi bir kənara qoyub, yalnız bu yarışı düşünürdük. İndi isə növbəti hədəf Paralimpiada çempionluğudur”.

Qeyd edək ki, parataekvondo üzrə Azərbaycan milli komandası Tokio-2020 Yay Paralimpiya Oyunlarına Sofiyada maksimum – dörd lisenziya qazanıb. Təmsilçilərimizdən Əbülfəz Abuzərli (K-44, -75 kq), İmaməddin Xəlilov (K-44, -61 kq), Röyalə Fətəliyeva (K-44, -49 kq) və Aynur Məmmədova (K-44, + 58 kq) avqustun 24-dən sentyabrın 5-dək Yaponiyanın paytaxtı Tokioda baş tutacaq Yay Paralimpiya Oyunlarında iştirak hüququna yiyələnib.скачать dle 11.3

Şahidi olduğunuz hadisələri çəkib bizə göndərin!