Bakı Ağır Cinayətlər Məhkəməsində Xaçmaz rayon sakinləri Şahin İmanov və Elbrus Abdullayevin CM-nin 120.2.1 (qəsdən adam öldürmə, qabaqcadan əlbir olan bir qrup şəxs tərəfindən törədildikdə) və 120.2.4-cü (xüsusi amansızlıqla qəsdən adam öldürmə) maddəsi ilə təqsirləndirilmələrinə dair cinayət işi üzrə məhkəmə prosesi başa çatıb.

Median.Az xəbər verir ki, ötən il iyunun 11-də Şahin İmanov Xaçmaz RPŞ-nə könüllü gələrək, 10 gün əvvəl tanışı Elbrus Abdullayevlə birlikdə rayon sakini Mirzağa Əzizovu (1967-ci il təv.) balta zərbələri ilə qətlə yetirdiklərini və sonra meyitini Əbilyatağı kəndi ərazisindəki meşə massivində basdırdıqlarını bildirib.

Məlumatla əlaqədar RPŞ və rayon prokurorluğunun əməkdaşları tərəfindən göstərilən əraziyə baxış keçirilib, basdırılmış kişi meyiti oradan çıxarılaraq məhkəmə-tibbi ekspertiza və patoloji anatomiya birliyinin Xaçmaz rayon şöbəsinə təhvil verilib.

Keçirilmiş istintaq-əməliyyat tədbiri nəticəsində Elbrus Abdullayev saxlanılaraq cinayət məsuliyyətinə cəlb olunub.

Məhkəmənin hökmü ilə təqsirləndirilən şəxslərin hər biri 19 il müddətinə azadlıqdan məhrumetmə cəzalarına məhkum olunublar.скачать dle 11.3