Azərbaycan ərazisinə Heydər Əliyev Beynəlxalq Aeroportundan daxil olan yerli və xarici vətəndaşlar hava limanında taksi xidməti ilə bağlı vəziyyətdən narazıdır.
Median.Az-ın “Report”a istinadən məlumatına görə, buna səbəb taksi sürücülərinin təyyarədən yenicə düşmüş sərnişinlərin üstünü hücum çəkməsi, onları az qala zorla maşınlarına mindirərək harasa aparmaq istəməsidir.
Üstəlik sürücülər potensial müştəriləri bacardıqca aldatmağa, onlara bazar qiymətindən azı 2 dəfə baha xidmət göstərməyə çalışırlar. Məsələn, aeroportdan şəhərin mərkəzinə getməyin haqqı maksimum 8-10 manat olduğu halda, insanlardan 15-20 manat tələb edilir. Halbuki, həmin yolu “Baku Bus” MMC-nin ekspress avtobusları ilə 1 manata belə getmək mümkündür. Amma taksi sahibləri vətəndaşlara heç avtobus dayanacağına getməyə imkan belə vermək istəmir.
Məsələ ilə bağlı açıqlama verən Bakı Nəqliyyat Agentliyinin (BNA) mətbuat xidmətinin rəhbəri Mais Ağayev da etiraf edib ki, aeroportda taksi xidmətinin keyfiyyəti qənaətbəxş deyil.
“Hava limanındakı vəziyyət BNA-nı qane etmir. Orada müəyyən taksi şirkətləri xidmət göstərsə də, həmin xidmət tələblərə tam cavab vermir. Hava limanı da ölkənin giriş qapısıdır və təyyarə ilə Azərbaycana gələnlərin ilk təəssüratı oradakı taksi xidmətinin hesabına formalaşır. Bu səbəbdən də orda xidmətin keyfiyyəti artırılmalıdır. BNA ekspress xətt avtobusları ilə hava limanından metronun “28 may” stansiyasına qədər sərnişindaşımanı təşkil edib. Bununla yanaşı, beynəlxalq təcrübəyə uyğun olaraq aeroportda taksi xidmətinin təşkili ilə bağlı konsepsiya hazırlanıb. Bunun icrası nəticəsində hava limanında həm vətəndaşlarımıza, həm də xarici ölkə vətəndaşlarına keyfiyyətli taksi xidmətinin göstərilməsinə nail olacağıq”, - deyə, M.Ağayev qeyd edib.
Heydər Əliyev Beynəlxalq Aeroportunun direktor müavini Kənan Hacıyev isə bildirib ki, hazırda 2 taksi şirkəti hava limanında xidmət göstərmək hüququna malikdir.
“Həmin şirkətlərə məxsus avtomobillərin aeroportun qarşısındakı zolaqlarda dayanmasına icazə verilib. Bundan başqa, hava limanının terminalları daxilində taksi dayanacaqları yaradılıb. Terminalların çıxışında isə taksilərlə bağlı məlumat lövhələri yerləşdirilib. Həmin lövhələrdə taksi şirkətləri haqqında məlumatlar var. Əsas məqsəd sərnişinlə taksi sürücüsü arasındakı dialoqu tamamilə aradan qaldırmaqdır”, - deyə o, bildirib.
Şahidi olduğunuz hadisələri çəkib bizə göndərin!
Son Əlavə