MİDA 1049 mənzili satışa çıxarır — qiymətlər 43 min 225 manatdan başlayır

Median.Az MİDA-nın satış elanına istinadən xəbər verir ki, satışa Hövsan Yaşayış Kompleksinin ikinci mərhələsi üzrə 5, Binəqədi Yaşayış Kompleksi üzrə 839, Şirvan Yaşayış Kompleksi üzrə 201, Yevlax Yaşayış Kompleksi üzrə isə 4 mənzil çıxarılacaq.

Satış qiymətlərinə ƏDV daxildir. Bütün mənzillər tam təmirli, mətbəx mebeli, kombi isitmə sistemi və kombi cihazı, eləcə də su, qaz və elektrik sayğacları ilə təchiz olunmuş vəziyyətdə təklif edilir.

Hansı komplekslərdə mənzili ipoteka ilə almaq olar?

Bu satış çərçivəsində Hövsan Yaşayış Kompleksinin ikinci mərhələsində və Binəqədi Yaşayış Kompleksində mənzillər yalnız alıcının öz vəsaiti hesabına satılacaq. Şirvan və Yevlax yaşayış komplekslərində isə alıcılar həm öz vəsaitləri, həm də ipoteka krediti hesabına ödəniş edə bilərlər.

Güzəştli mənzillərin əldə edilməsi qaydasının 5.6-cı bəndinə əsasən, ipoteka ilə ödəniş üsulunu yalnız ilkin razılıq qərarını almış və həmin qərarın elektron kabinetində yerləşdirilməsini təmin etmiş şəxs seçə bilər.

İpoteka və Kredit Zəmanət Fondunun güzəştli ipoteka krediti üzrə illik faiz dərəcəsi 4 faiz, kredit müddəti 3 ildən 30 ilədəkdir. Elan üzrə aşağıdakı aylıq ödənişlər minimal ilkin ödəniş və 30 illik kredit müddəti əsasında hesablanıb.

Azərbaycan Respublikası Prezidentinin 16 noyabr 2016-cı il tarixli 1113 nömrəli Fərmanına əsasən, mənzillərin əldə edilməsi Elektron Hökumət İnformasiya Sisteminə inteqrasiya olunmuş “Güzəştli mənzil” sistemi vasitəsilə elektron qaydada həyata keçirilir.

Satışda yalnız “Güzəştli mənzil” sistemində elektron kabineti olan vətəndaşlar iştirak edə bilərlər. Elektron kabineti olan bütün vətəndaşlar qeydiyyat tarixindən və sıra nömrəsindən asılı olmayaraq mənzil seçimində bərabər hüquqa malikdirlər.

Satış modulundan istifadə və gözləmə qaydasında mənzil seçimi üzrə mətn və video təlimatlar elektron kabinetlərin müvafiq bölmələrində və MİDA-nın saytındakı “Güzəştli mənzil sistemi” bölməsində yerləşdirilib. Ərizənin təqdim olunması, satış şərtləri və agent banklar barədə məlumatı MİDA-nın saytından, Bakı şəhərindəki 5 saylı “ASAN xidmət” mərkəzindən və ya 108 çağrı mərkəzindən almaq mümkündür. MİDA-nın rəsmi saytı · Agent bankların siyahısı

Binaların tikintisi və mülkiyyət sənədləri

Elana əsasən, bütün binalar Azərbaycan Respublikasının Dövlət Tikinti Normalarına (AzDTN) uyğun layihələndirilib və inşa olunub. Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin Təsisatdankənar Dövlət Ekspertiza Baş İdarəsi dörd layihə üzrə müsbət rəylər verib. Mənzillərə mülkiyyət hüququna dair dövlət reyestrindən çıxarışları Daşınmaz Əmlakın Dövlət Kadastrı və Reyestrinin 1 saylı Bakı, 13 saylı Şirvan və 17 saylı Yevlax ərazi idarələri verib.

Hər bir mənzilin və otaqlarının dəqiq ölçüləri, satış qiyməti və agent banklar barədə məlumatla MİDA-nın layihələr səhifəsində tanış olmaq mümkündür. MİDA-nın layihələri