2027-ci ilin dövlət büdcəsi ilə bağlı hazırlıqlar artıq gündəmin əsas iqtisadi mövzularından birinə çevrilib. Yeni büdcədə gəlir və xərclərin hansı istiqamətlər üzrə formalaşacağı, sosial ödənişlər, maaş və pensiyaların artırılıb-artırılmayacağı, eləcə də əhalinin gəlirlərinin inflyasiya fonunda necə dəyişəcəyi cəmiyyəti maraqlandıran əsas suallardandır.

Bəs 2027-ci ilin dövlət büdcəsi adi vətəndaşın gündəlik həyatına necə təsir göstərə bilər? Büdcə xərclərində hansı istiqamətlərə üstünlük veriləcəyi gözlənilir və qarşıdakı ildə əhalinin sosial-iqtisadi vəziyyəti baxımından hansı dəyişikliklər mümkündür?

Mövzu ilə bağlı Median.Az-a açıqlama verən iqtisadçı Eldəniz Əmirov bildirib:

"2027-ci ilin büdcəsində sosialyönümlü xərclərin toplamı ümumi büdcənin təxminən 44 faizini təşkil edir. 2026-cı ildə isə bu, 41 faiz idi. Bilavasitə pensiyalar üzrə də 2027-ci ildə indeksasiya təbii olaraq olacaqdır. Hazırda konkret faiz məlum deyil".
Eldəniz Əmirovun sözlərinə görə, bütün hallarda artım baş verəcək. Eyni zamanda 2027-ci ildə minimum əməkhaqqına baxılması da yenidən gündəmdədir. Böyük ehtimalla əməkhaqqının da artırılması baş verəcək.
İqtisadçı qeyd edib ki, artıq dövlət sektorunda çalışanların əməkhaqlarının artırılması var. Müavinətlərdə, təqaüdlərdə müəyyən qədər artımlar gözlənilir.

Təhsil və səhiyyə xərclərinə də toxunan mütəxəsis əlavə edib:
"2027-ci ildə təhsil və səhiyyə xərcləri də artıb. Bir çox istiqamətlərdə artımları müşahidə edirik. Bəzi istiqamətlərdə bir qədər çox, bəzilərində isə bir qədər az artımlar olsa da, sosial xərclərin heç birində demək olar ki, azalmalar baş verməmişdir. Əksər istiqamətlərdə artımlar var".

Dəniz Pənahova
Median.Azскачать dle 11.3